不知何年何日....

新馬仔首歌：「不知何年何日得嘗所望....」

停一停、諗一諗，有冇一啲嘢係你好唔想做、又唔做唔得嘅呢？

唔好答冇。因為冇可能，一定有嘅...

好似天時冷，大帔冚個頭時，叫你起身，你想唔想起身吖？(除非唔駛返工，但係無論你瞓到十一、二點，結果都要起身架---唔食早餐、都要食晏掛？學吓我咁，我一日廿四小時唔食嘢都得，因為自小接受軍訓)

十號風球叫你返辦公室當更，你想唔想吖？(老豆大把，做唔做都得就可以，但老豆大把嘅人唔多)

煮婦日日煮飯，咁啱果日唔想煮，但係佢老公唔肯出街食，淨係鍾意食住家飯？(我有位朋友，佢先生真係咁架！佢唔煮、佢老公就唔食，所以想約佢出街食餐飯都唔得；你會唔會為左唔駛煮餐飯叫個老公去搵小二、小三、小四吖？)

過時過節，街市買餸樣樣都貴，咁唔買咩？(果啲日子出街食仲貴喎)

外母/奶奶生日(老爺/外父可能得)，你可唔可以當冇事發生？(可以嘅，如果佢地都唔存在)

總之，每個人都有一些唔想做、又唔做唔得嘅事。

不過，我好啲，以上所講嘅嘢都唔會發生響我身上----我自小接受軍訓：聞雞即起，唔會賴床(即使發燒都唔准瞓、病都唔可以睇醫生(自己會好架啦))；十號風球返工？濕濕碎啦！當年我住市區、返粉嶺，要返工當更第一個到達嘅就係我(最驚係搭唔倒的士啫)；煮飯？更加冇問題啦！以前我唔入得廚房(有人有潔癖)，依家我自主，所以鍾意煮食，補番以前失去嘅嘢；餸貴？咪食少啲囉，我個肚皮好有彈性，真係食唔食都得--一個麵包食幾餐都試過；奶奶？唔好意思，真係唔存在喎！

唉！最弊係仍然有一件事唔做唔得，做又做得唔開心！唔知我有生之年有冇機會唔駛做呢？