蕃茄炆牛腩
2014/01/05 14:51:29
網誌分類:
食譜
呢個原本係「吾淑吾食」節目介紹嘅食譜,原食譜材料係:
蕃茄炆牛筋腩
牛筋腩一斤稍出水
番茄6個去皮切小粒
茄汁 1杯
紅蘿蔔 2個切滾刀
八角2粒
香葉三片
香茅2棵略拍切段
調味:冰糖2茶匙 魚露適量
燒油爆番茄粒、紅蘿蔔、牛筋、八角、、茄汁、香葉、香茅、冰糖及蓋過面水,炆兩至三小時,夠稔下魚露調味。
哈哈!我將佢改成:
蕃茄炆牛腩
牛腩一磅 (大棧買嘅:一包一磅。包裝上講煲或炆廿五至三十分鐘,經驗話俾我聽係絕對唔少得過兩小時!可能佢係講緊用高速煲掛。而且佢啲牛腩麻麻,唔會再買)
中型番茄四個
茄膏1/2碗代替左茄汁(我總覺得用茄汁唔妥當!雖然話係fusion煮法啫,你睇吓製成品都係比較淺色,當然可以加老抽整色整水,但係落茄膏係有色香味有齊)
紅蘿蔔一小個(夠食啦)
八角一粒(八角味濃,所以我祇落一粒)
香葉三片
香茅粉一茶匙(新鮮香茅買一次用唔晒,一茶匙香茅粉等如一枝新鮮香茅,我又將佢嘅份量減左一半)
調味:冰糖同魚露冇變
註:
一. 呢個方法同我平日煮開嘅最大分別係加左蕃茄,而且份量頗多!我平日會加紅酒,今次跟佢個食譜改左用香茅、八角同魚露調味。
二. 可能蕃茄太多,冰糖要比相中所見再加多啲。
三. 攪咁多嘢,味道冇咩特別,亦冇咩嘢必要用咁多番茄;所以,我日後都係用番我自己嘅方法炆西式牛腩/牛肋條。
咁肥膩同濃味嘅餸,一於配個「清炒豆苗」啦!
清炒豆苗,正,我會流口水! 蕃茄炆牛腩,麻麻地,都係鐘意清湯腩!
我都係唔正宗,改到佢體無完膚啦!
果然撞餸、不過當然係你整嘅正宗啦!
所以依家間中都捨得買啲貴價食材自己煮嚟食,出街食就唔捨得啦!尤其是唔知係咪依家廚師質素每下愈況,呢排出街食都覺得啲嘢唔好食,寧願自己煮!
係囉!都唔知有冇攪錯,雖然豆苗係比其他菜貴,都唔係貴成咁下嘩?
我一定唔捨得響餐館叫呢d自己整到又貴好多嘅菜架!(我又cheap又孤寒吖馬!)但大仔鐘意,冇計啦!
豆苗同牛腩煲差吾多同價?豆苖係比其他菜貴,但係我買得少,HK$14四两。
昨晚大仔響度食飯,冇準備啱佢嘅餸,太凍又唔想出街,叫佢去買外賣,一個支竹牛筋腩煲$17,同一個蒜茸豆苗$16(起左價),好貴呀!響餐館食豆苗,唔抵!
不時不食,衣家豆苗靚,吾 食佢食咩?淨係佢先可以買四兩架咋!
阿媽好富貴呀!成日食豆苗,好貴架!我唔鍾意魚露,茄膏都勉強可接受。只勉鍾意番茄!