唱歌練聲
2014/01/16 18:44:11 網誌分類: 粵曲理論
早幾日同幾位音樂師父食飯，我問佢地覺得現今內地唱平喉嘅男士邊位最好呢？
曲友問：「黎俊聲算唔算？」
師父一致認為黎祇係唱「孟姜女尋夫」比較好，其他啲歌冇咩特別！
講到阿咩嘢團長，佢地話佢經已失聰，所以經常走音----呢樣嘢我都聽得出！
我答：「其實每個演唱者對唔同類型嘅曲都有強弱，某人唱文場可以，唱武場唔得；相反亦是！」
音樂師父(又幾一致喎)覺得暫時嚟講，兆明算係比較平均嘅一位。
至於內地嘅子喉唱家，唔知大家有冇同感----得把聲！大部份唱歌都唔得細緻，做手亦如是，總之交左差便算。
近期一篇藍天佑專訪，佢九歲便在內地學習粵劇，來港後修讀演藝學院中國戲曲文憑課程(呢啲純粹係想攞張香港嘅證書啫，難道內地所學仲唔夠用)，現今是粵劇後起之秀；年方廿九，有排玩！
藍講到：「粵劇演員好講唱功，平時練聲，仲要養聲，因此平日說話不會大大聲，免得傷害喉嚨。內地演員每天要一早跑步同對住個山嗌一個鐘頭聲，日日如是。」
香港地，有幾多人可以朝朝得閒去跑步，去邊度搵個山頭嗌聲？即使響屋企大聲嗌幾個音都可能俾隔離鄰舍投訴。正因如此，香港人普遍聲唔夠人地響(有些天生聲大嘅唔講，始終人數唔多)，但係香港粵劇花旦唱歌細緻好多，做手亦細膩好多。
在香港業餘而又有興趣演戲者，很多將重點放在基功上，而忽略了唱歌技巧。所謂唱、做、唸、打，「唱」係行先架！
應該係平喉果位俾錢请大陸花旦唱嘅！
七月有一次去睇朋友做折子戲，同場有啲係粵曲演唱嘅，男嘅係香港，女嘅係國內，男聲好好聽，但女聲唱嘅子喉，好似唱藝術歌咁！唔好聽。
同意亞夢講、我都係喜歡香港演員‧
我始終都係鍾意香港演員的演和唱，國為花旦把聲好似個個都差唔多。
係詹浩鋒，以前都是國內學戲，輝哥契仔。
內地花旦把聲太尖,刺耳!不過,我只聽過有限幾位,不能一概而論.
我喜劇聽區凱明，不過佢是小武，唱武場好聽，殺忠妻以佢唱得最好。黎的唱腔進步左。
同意，很多業餘表演者，做唔錯，可以話幾好，但唱就一般，聽過很多人都上唔到高音，平、子喉都係。
年青粵劇演員中我只欣賞兆明，佢近年唱腔成熟左很多，文場武場都演到。藍很刻意仿聲哥。而家有個新演員叫蕭浩峯，功夫很好，唱腔有待改進，扮相唔錯。
大陸花旦我數唔到，文潔算唔錯。
我講既係職業演員。