中加港曲友/網友交流會

一年一度中加港曲友/網友交流會，隨著尋日最後一個唱局，算是為今年的聚會劃上完美的句號。

尋日一早北上，因為訂左局半共六小時---正午十二時至六時。今次人數頗多，每人都祇係唱得兩首，梗係吾合我一向嘅原則(原本最初訂左星期四，我唔得閒；誰料網友TT位四阿哥，好提議、唔提議，叫佢地改期嚟就我！咁真係唔上好唔好意思啦)：每次北上唱少過四首吾駛預我，嘥時間兼嘥車錢！阿仔又吾同，佢車費十幾蚊一程、我卅幾蚊一程；呢個咩野政府黎架？有咩嘢理由阿仔搭車較阿媽便宜架！

唔係講笑架。何解要山長水遠北上唱歌啫？因為便宜吖馬----其實港紙對人仔越嚟越唔化算；上去唱一首歌，貴過響香港唱；唱兩首，收支剛平衡、不過浪費時間；唱三首，有微利；唱四首才值得！

為左減少損失，一早响隔離間曲社訂多兩個小時(遠果啲又無謂啦！我地成班A貨年輕人，走唔起呀)，咁咪每人都可以唱倒三至四首囉。唉！誰料人算不如天算，果間曲社竟然為左避我，執埋笠！

結果.....還原基本步囉！

不過，呢個天關左一扇門、又會開番一扇窗俾你嘅----早一日先因為總總原因，我同阿仔可以唱多首歌(共三首)、到曲終時有又時間剩，人地位四阿哥立刻話同VAN仔唱多首歌。

我：「VAN仔？佢出左去扮靚喎！」

四阿哥：「唔係VAN仔、係VAN媽至啱。」（又一次失梅用桃代？）

因此，我又唱左四首歌，有少少進帳啦！

回程時，加國網友與我同「車」到紅磡火車站轉車。佢地講明明年未必會回港(因為冇回港嘅藉口，咁又真：冇特別理由，返港一次酒店錢幾萬、連機票食宿真係唔化算！花咁多錢為左返嚟唱歌？同樣嘅錢響加國唱到啞都得咯)，到站時依依不捨，但是---不忍別時終須別，惟有講聲珍重再見啦！

原本想立刻上載同四阿哥唱嘅歌---俾TT聽吓。但係出左啲技術上問題！晏少少睇吓攪唔攪得掂。