植入式廣告

「植入式廣告」，雖然呢個名詞好似係新發明咁，其實呢個做法一向都有，祇不過最終將佢發揚光大嘅係MAY姐，結果俾人鬧爆！

烹飪節目，響方太年代經已時興響節目度賣廣告；不過當時係明買明賣，好似果日標題係「雙羊百搭煮食新時尚」咁，唔駛講你都知當日示範嘅係用雙羊牌米煮嘅食譜、又或者「史雲生雞湯...」，教你一味餸用上三罐史雲生雞湯，當時冇人投訴喎！

肥媽烹飪節目，如果係「百福豆腐」贊助嘅，咪一樣將幾十盒豆腐放響鏡頭前，又響你面前教你點樣開果盒豆腐！一樣冇人投訴。

依家「都市閒情」Annie師父咪味味餸用榮華臘腸(咁梗係因為榮華贊助啦)，一樣唔見有人投訴！

分析原因：人地講到明係邊個贊助，觀眾亦預左果味餸一定係用贊助商嘅材料煮---好似我咁唔食臘腸嘅、你唔食豆腐嘅、或者好似我咁「唔臭米氣」嘅，咪唔好睇呢啲節目、留番啲時間做第二樣嘢囉！

同樣「植入廣告」，何解淨係MAY姐俾人鬧？因為佢呢個唔係純烹飪節目、因為佢植入得唔合情理(沙律甜品都要落雞汁)、因為咁啱果段時間傳媒有某些人、某些事想鬧，搬佢上檯。

早前有人投訴響「愛回家」植入電話廣告。個人覺得手提電話差不多每個人都擁有，響電視度出現角色拎住某個牌子嘅手提電話、如果唔係特別誇張咁影出嚟，我覺得問題不大；反而同劇郭少雲晚晚頸上纏住不同款嘅大披肩先至突兀！原本我一向都留意倒，早輪姪女同我一齊睇緊套劇，當晚講緊佢地一家人響屋企，郭著住件睡衣，頸纏大披肩，我問姪女：「佢係咪頸紋太嚴重、要遮醜？」

姪女：「好似唔知係佢、定係佢朋友嘅店賣披肩，佢幫手宣傳啫！」

我：「咁都冇理由響屋企著住睡衣都纏住條大披肩吖！要嗎便一早報定案，話佢自幼弱不襟風，所以夏天都要用披肩，咁第日夏天都一樣可以當廣告咁帶住！」

其實觀眾睇嘢，係講求合唔合符情理啫！理得你植入廣告。

呢啲披肩係響兩個半小時處境劇裡面出現過嘅，可惜冇影到著睡衣圍大披肩果張相！