各安天命、自求多福！

上星期有一單報導，指瑪麗醫院去年換錯心，令女病人最終不治的事件。

其後，醫院發言人指病人即使沒有換錯心，也等候不到適當的心臟移植，故此這宗錯誤的手術已經為病人帶來額外幾個月的生命。瑪麗醫院指個案已轉介死因庭跟進，並向死者家屬致以深切慰問，提供所需協助。

當時睇倒報導，第一個反應係：有冇攪錯？換錯心唔道歉、仲要咁講？即使病人搵唔倒合適心臟移植、最終都係死亡，起碼佢唔駛捱多一刀！心臟移植係大手術---病人有冇同意為左可以生存多幾個月去捱呢一刀？又或者即使佢冇做呢個手術，佢都可以生存多幾個月呢！

又從另一個角度睇：呢個心臟如果移植響合適嘅輪候病人身上，可能醫好左另一個病人！

有冇咁嘅經驗：響醫院做任何手術前，醫生/護士會要求病人(或者家屬)簽張紙，大意係「任何手術都有危險，病人同意冒呢個險。」

你唔想冒呢個險咪唔簽囉，佢地亦唔會勉強你做手術！呢樣係例行公事，即使做果個手術根本冇風險可言，呢個手續必須要做。我嘅理解係如果醫護人員手術程序冇出錯，而病人因其他問題(如身體出現排擠)，那醫護人士便無須負責。

但必須強調「醫護人員手術程序冇出錯」呢句，如上述那種換左唔適合嘅心臟給病人，算唔算出錯？自有公眾評論。

我阿媽前日入醫院輸血。佢同我講：輸血前護士要佢簽張紙。

佢問張紙寫咩嘢？護士同佢講：「你簽左張紙，證明你同意輸血。咁之後發生咩嘢事，就唔關醫院事。」

阿媽話前年佢曾入醫院輸血，當時冇要求佢簽呢啲紙(突然間咁好記性嘅)！我相信係因為剛剛發生左換錯心件事，所以醫管局急於補鑊，諗定啲嘢保障自己。

如果我阿媽所講嘅係事實(我相信係事實。一來佢比好多老人家精靈，二來關於佢自己嘅嘢佢好清楚，淨係唔記得其他人嘅嘢)，咁即係話我地第日去政府醫院做任何治療都可能要簽呢張紙！

如果係咁，我會理解成：

一. 第日你去政府門診睇醫生，醫生斷錯證，你越醫越嚴重！你冇得追究，因為你同意左俾醫生醫你，一切風險貴客自理！

二. 去藥房配藥，配藥員配錯藥，食到你得番半條命(最慘係唔生唔死)！你冇得追究，因為你同意左佢幫你配藥！

用常理去諗：輸錯血有咩理由冇得追究(如果咁輸血前唔駛驗吓你咩嘢血型啦，是但輸一種血，睇你好唔好彩數囉)？如果做緊手術醫生講私人電話、做完手術留低左啲儀器響病人體內、脫牙脫錯左隔離果隻、開錯藥.....你都冇得追，因為你簽左張紙！

專業人士，包括醫生、律師都有所謂duty of care。何解病人或者客人要搵你啫？因為你有嘅專業知識、佢冇吖馬；因為你係醫生，病人先相信你講嘅嘢、信你開嘅藥、信你佢要做某個手術先至會好....結果，醫生醫人之前要人地簽定張免責條款，合唔合理吖？

很久以前，有人響公廁跣親告政府，所以依家公廁內都有告示提醒使用者要留意地面濕滑。但係免責條款祇能在某些情況下減低所犯者的罪(如公廁的清潔清況合一般要求)，但不能將之變為免死金牌。但這祇是告示，冇要求使用者簽名。不過日後政府會唔會要求公廁使用者響入公廁前簽紙，咁樣佢地響公廁度扑親、撞親、跣親...咩嘢都唔關政府事呢？