蒜茸牛油焗龍蝦尾

去年尾響「大棧」買左一包「龍蝦尾」：$99.90。

其後我位少年廚神朋友告知，「大棧」果啲係波士頓龍蝦(包裝冇寫)，佢響759阿信屋賣果啲中東龍蝦尾($100左右一隻，個子較大)好食好多：更爽、蝦味更濃！

聽見佢咁講，我梗係用蒜茸牛油焗啦----味唔濃咪要用濃味嘅方法煮囉！

龍蝦尾兩條  一開四共八件

牛油           應該用有鹽牛油 (我屋企常備無鹽植物牛油，所以煮時要加幾粒鹽)

蒜茸           多少隨意 (鍾意嘅梗係落多啲啦)

上湯           幾湯匙 (冇嘅咪用水囉)

(以上係基本材料，捨得嘅白酒同忌廉係可有可無嘅材料)

一. 鑊內燒少許橄欖油，下牛油(大約一湯匙)煮溶。

二. 龍蝦尾煮時才在蝦肉那面撲少許生粉，將肉那方先放入鑊內煎。

三. 下蒜茸(不宜早放，易燶)，如需下鹽便落(唔落問題不大)，下少許上湯(主要唔想太乾，但龍蝦本身有水份，所以落湯份量視乎水份夠唔夠；也可落白酒少許代替，亦可兩樣都落)，稍為蓋上焗一兩分鐘至熟(有忌廉又捨得嘅都可以落少少，落了汁較濃)。

試後感：

個人覺得蝦肉都幾爽，至於冇中東龍蝦咁有蝦味，因為冇得比較，我唔知。食味都可以，不過我唔會再買、亦唔會試吓買中東龍蝦食作比較。因為我食嘢原則係money for value(物有所值)，至於值唔值又同個人口味有關嘅。一來我唔係特別鍾意食龍蝦(用呢個價錢買靚嘅大蝦食好過)；二來用呢個價錢我買細細條海魚蒸嚟食好過。

可能你會問：咁當初你又買？哈哈！我份人係鍾意嘗試嘅，唔食過又點知唔好？唔食過又點知唔抵？冇理由單憑個樣就判人死罪架！歌仔都有得唱啦：試過方知酒濃，愛過方知情重....

同樣煮法，可以用蝦代替。