温故知新

曲友芳芳去年底經己约定我尋晚食開年飯，何解咁遲？因為我尋晚先上課，佢又係，又係响太子，因利成便，吾駛專登出去。

我地响始創中心間（小小拉麵）食，當時五點幾，得幾個客。兩個人叫左：

1. 雪菜咸肉炒年糕

2. 涼拌青瓜

3. 醺魚

4. 小籠包

埋單$215。食嘅嘢同「翡翠拉麵」差不多，食物質素算唔錯，最好係招呼---侍應唔駛叫都不斷同我地加添熱茶；走嘅時候七點左右經已客滿。

兩個唱歌嘅人，三句不離本行講唱歌。我同芳芳嘅默契係隔一個月同佢操幾首歌，唔同我操嘅月份佢同書友仔操佢地剛學嘅歌。正因如此，我建議佢同我操番以前學左嘅舊歌；至於佢新學果啲，如果我都鍾意嘅，才會學嚟同佢操。

尋日佢表示呢個安排好好，因為好多舊時唱過嘅歌，原來再唱番係有唔同感受嘅，有些以前唱錯、唔明何解嘅，依家再唱又明白多左！

芳芳另一位朋友，鍾意追新歌，咩嘢歌都識，但係冇咩邊首唔kick。出騷唔新嘅歌唔揀，有些時連自己啱唔啱唱都未知，便報名唱，結果....

但係最弊捧場嘅朋友，一般都係對佢有讚冇彈。有次佢同我操「聲聲慢」，佢之前決定同我操呢首歌果陣同芳芳講，呢首歌佢出騷果陣朋友對佢讚不絕口，唱完我咪知咩嘢事囉！不過，好似芳芳話齋，呢啲人唔話得，所以我同佢唱完就算，一句說話都唔會講！我份人衰：唔可以講啲違背良心嘅說話，所以只可以等有律師到場先至講嘢。

我成日都係果句，有一兩首見得人嘅歌好過你識唱一百首歌、而冇首見得人！