香茜羊肉片

我最鍾意用火鍋用切左薄片嘅肉類煮餸，一來貪佢一盒得四兩左右(夠少)、二來即使係牛肉煮出嚟都唔會靭。不過，今次用左羊肉片---我諗好多人唔鍾意食：一係嫌羊肉騷、一係唔鍾意食芫茜、三係唔鍾意用左磨豉醬...咁真係幫你唔倒！

材料：

火鍋羊肉片一盒     160克

芫茜                   三至四棵，清洗後切長段

乾蔥片                一粒

調味汁料：

蘑豉醬一湯匙

糖      3/4茶匙

水      2湯匙

酒      1茶匙

麻油/胡椒粉

一. 先將調味汁料混合。

二. 燒油炒羊肉至九成熟，上碟倒去鑊內汁液(以減低羊肉騷味)。

三. 燒油爆乾蔥片，下汁料煮勻，羊肉回鑊炒至全熟，加入芫茜炒勻即可。

註：

我用左頗多芫茜，一來因為我鍾意食，二來街市一束束賣，最少都要買兩蚊！咁啱我又唔駛要蔥，否則芫茜加蔥兩樣份量剛剛好。