蝦米炒椰菜
2014/03/01 09:09:27 網誌分類: 食譜
唔係馬,呢啲咁淺嘅嘢都寫?愿諒吓啦,今日北上「出騷」,係咁倚搵啲嘢充斥個網,唔想dum懶個身啫。
早前中學同學聚會,佢地提到綠色椰菜比白色果種好食;我一向好少買椰菜食,即使買、多數都係用嚟煲湯(羅宋湯主要材料)!尋日見「惠記」賣$7.9一個綠色椰菜,咪買嚟試吓係咪真係好食啲囉。
材料:
椰菜 切絲(我祇用左半個,留番半個嚟煲湯)
蝦米 浸軟,水留用(多少隨意。蝦米貴過椰菜架)
一. 燒油爆蝦米,下椰菜炒勻。
二. 下鹽、糖(少許吊味)炒勻,下浸蝦米水,如不夠另加清水少許,炒勻蓋上煮至菜稔。
註:
一. 冇諗過咁好食,啲椰菜又稔又甜!剩番果半個可能我都係炒埋嚟食。
二. 如果鍾意用雞粉嘅,連鹽、糖都唔駛落(蝦米水有少許咸味),落雞粉代替。
三. 水份不要太多,煮熟唔見水便最好!(我梗係咁講啦!我果碟係咁吖馬)
四. 相中果碟我經已食左三份一先記得影相。
五. 老一脫人認為椰菜濕熱,喜歡嘅咪響爆蝦米果陣落兩片薑囉!
六. 蝦米同蝦乾都幾貴,不過落少少吊吓味,大大碟都唔駛十蚊雞,安全過食「一蚊雞」啦!
麻麻地鐘意食椰菜,但又唔抗拒攞,但係未食過蝦米炒椰菜喎!
椰菜是我的至愛,用番茄很好食架。
响Solomon Islands 住果段時期,冇咩菜可以食,最多係西芹,椰菜,經常蝦米炒椰菜,椰菜炒牛肉.....都幾好食架!
祝妳出騷順利成功,Good Show!