炒菇菇

又炒菇？係呀！食菇有益吖馬----有痛風者例外。

尋日響759阿信屋買左樽「蒜油」，跟住響「惠記」買左兩盒菇：台灣白菇同迷你秀珍菇(Baby Oyster)，兩盒盛惠廿蚊。

菇唔可以用水浸洗，信得佢過嘅唔駛洗、信佢唔過嘅都祇可以用稍濕嘅布抹吓，否則煮到一鑊水！

我買兩種菇啫(買得多食唔晒)，人多嘅咪買多幾種炒雜菇囉！本菇(啡色)同短白菇都係有啲苦澀味，唔鍾意嘅咪用第二啲菇囉！

材料：

迷你秀珍菇一盒

短白菇一盒

蒜油一湯匙

洋芫茜碎1/2湯匙

汁料：

蠔油一湯匙

糖1/2茶匙

生抽1/2湯匙

水三湯匙

粟粉一茶匙

一. 菇切去根部，用手撕開一束束，大小隨個人喜好。

二. 用少許油爆透菇，下蒜油再炒一會，加入洋芫茜，然後續少加入汁料炒勻。

註：

一.冇蒜油咪落蒜茸囉！

二.冇洋芫茜或者唔鍾意嘅咪唔落囉！

三.咁冇菇呢？咪唔煮囉！