七個女人！

前日中學同學聚會，今次七個女人做咩嘢呢？都講左啦，食飯同竹戰吖馬。

七個女人，點竹戰呀？四個高B班一檯(我係其中一個。我都算高B？高定低係比對啫！唱歌都一樣，有人讚全個「騷」你唱得最好！你唔駛咁高興，可能係同台果啲比你更差---海軍鬥水兵啫；而且，我呢個正牌魚腩，好受歡迎架)，一檯三個低B班打三腳。

雖然話係打麻雀，呢個祇係用嚟消磨時間嘅動作，實情我地每次聚會都係交流家政心得(我地都係家政班畢業)，今次因為知道其中一位書友仔有門路買倒啲又靚又抵食嘅海味，咁咪一於搭佢買番啲花膠食囉！(佢俾埋個版我地睇)

食晏果陣，梗係有人早到、有人遲到架啦！我通常都係數一數二早到果個，見阿S入嚟果陣，披住條披肩。我問：「又有新製成品？」(上個月我織果條圍巾都係學佢織嘅)

S：「係呀！新年去左美國兩個月探女，無所事事咪織冷衫囉。」

我：「不過，你呢條披肩好似有啲問題喎！」

大家覺唔覺得佢有問題？知唔知道問題何在？

S：「哎呀，你真係睇倒架！我諗住唔覺、所以懶得拆左佢改咋。」

我：「第一：披肩係一邊插入另一邊嘅，好明顯，兩面唔平衡；第二：深度長過手較，所以稍舉一吓手，便會鬆脫；此外，(呢樣嘢唔算錯，祇係可以做得更好啫)披肩本身有花，你用花冷織，果啲花唔起眼，嘥左！」都話我把口唔收架啦！看不過眼就要出聲。不過，我班書友仔係唔會唔開心嘅，佢地未退休前有一半係教書女士，如果明知有錯都唔改、咁點教學生呀？

S：「係呀，因為兩面收針邊闊邊窄，所以睇落唔平衡；同時亦真係織得深左，所以你講嘅嘢，經常發生。」

至於唔應該用花冷呢個意見，一致通過。話雖如此，我地都叫阿S寄個Pattern俾我地學！

果日因為午餐食得太飽，所以冇好似平時咁響會所食晚飯，差唔多九點幾至去附近茶餐廳食牛腩雲吞麵解決。食嘢果陣阿V同另外兩位書友仔坐響我對面(佢係低B班，打麻雀果陣唔同檯)，我問：「阿V，何解你面色咁黃？」

其他書友仔：「係咪因為佢帶左條綠色頸巾同黃色衫呀？」

我：「唔係，因為你兩個夾住佢響中間，佢啲面色真係好黃！」

V：(迷底解開了)係呀！我自己身體釋放唔倒胡蘿蔔素，所以成個人好黃，包括手同腳！」

我地大家都知道食得胡蘿蔔素過多，面色會偏黃嘅。但係如果唔係食得過量而自己又可以正常釋放，問題唔大！

胡蘿蔔素資料：

胡蘿蔔素能夠活化維他命A，預防夜盲症及視力減退，亦可以滋潤眼睛，預防眼部發炎，並且預防及改善視網膜黃斑區病變、白內障、乾眼症、眼睛疲勞等眼部問題，對保護眼睛十分重要。美國多項研究顯示，多吃含豐富胡蘿蔔素（特別是β胡蘿蔔素的食物）有助減低患上黃斑點病變機會。

胡蘿蔔素是無毒的。過量的胡蘿蔔素會導致胡蘿蔔素皮膚沉(carotenodermia), 具有顯著黃色的皮膚。但不同於黃疸，過量的胡蘿蔔素不會使得眼睛的結膜變黃，因此易於從外觀上區別二者。胡蘿蔔素血症最常見的原因是吃了太多的胡蘿蔔，但也可能是其它危險情況的醫學信號。

睇到呢度，大家唔駛驚慌。阿V有位做醫生嘅老公，據佢講對健康係冇影響嘅，祇係唔好睇啫---而且阿V經己戒食所有含胡蘿蔔素嘅食物！

心諗：如果我地儲埋啲錢，身體自己唔識得釋放出嚟，咁咪唔駛成世打工囉！