壓力

一般人覺得有壓力，通常係來自工作或者讀書。

如果你唔喜歡讀書，但唔讀又唔得---九年免費教育，唔讀犯法架！以前冇讀書緣咪做嘢，睇吓自己嘅能力學一技之長，搵倒食就得啦！依家無論你幾唔鍾意讀書，你點都要捱完果九年，承受得起壓力嘅，咪冇問題囉，承受唔起嘅，分分鐘讀到痴線！

工作壓力，有些時也是必須要面對(唔食咩)。所以人需要搵啲方法減壓，唱歌對我嚟講係減壓嘅方法之一，否則我一早痴左線！

過去果一年，一直腰骨痛，食中藥、針灸左大半年，祇係好左少少，一直唔斷尾。我見食左咁耐藥都未好，心諗：不如停吓先。有人話：食西藥傷肝、中藥傷腎喎！計我話：中西藥都傷荷包至真，個個月唔見幾千銀！

奇怪，冇再覆診(當然亦都冇藥食；都冇藥醫咯，食嚟做咩嘢吖)，呢兩個星期，腰骨又好似唔係幾痛喎！心諗：係咪因為學「阮」報錯高級班，所以壓力大呢？呢個月自動降班，所以冇左壓力呢？不過，我唔認為上錯班會令我有壓力-----學阮祇係興趣之一，又唔係學嚟搵食，點會有壓力呢？同學學左幾年，玩得好過我係應該嘅，老師叫我做唱局、我請佢食檸檬佢都冇迫我，何來壓力呢？

呢個星期，腰痛又少左喎！呢個幾星期發生左啲事，我依家終於明白，原來如果你唔想做一啲嘢、但係唔做又唔得嘅，果種無形嘅壓力係好傷身嘅！同你唔鍾意讀書、但唔讀又唔得一樣啫！

有些人，你好唔想見，但係唔見又唔得；每次你迫自己去見佢果陣，你個心就唔舒服，每次離開果陣成個人輕鬆晒！久而久之，就會響你身上形成一種無形壓力，最慘係駛左咁多醫藥費，一年後先至知係咩嘢原因。

都好，遲知總好過唔知，知道壓力來源就可以有辦法解決啦！你估我好鍾意食藥咩？你估我唔知食得藥多唔好咩？