「蛋蛋」專門店
2014/03/25 10:38:33
網誌分類:
生活
嘩,唔係馬,蛋都講一餐?
係呀,我相信一些較大的街市,都會有一檔「蛋蛋」專門店。雞蛋、鴨蛋、咸蛋、皮蛋、鵪鶉蛋....總之話得出嘅、又有人食嘅蛋都有得賣----所以龜蛋欠奉!至於壞蛋咯喎,通常都係買果個:我係其中一個!
即使係雞蛋,都分多蛋白、多蛋黃、紅黃、白黃、美國蛋、中國蛋、泰國蛋....相中所示係十蚊七隻多蛋白嘅雞蛋。選擇頗多,豐儉隨意,仲有十蚊五隻、六隻、八隻..
我每次買十蚊蛋,蛋叔都會講:「你買廿蚊啦!送多一隻。」
我:「你送俾我都冇本事要,食唔切!不過,你啲蛋真係好襟放,我放左成個月都仲未壞!」我當然唔係有心放咁耐,係因為早餐差不多日日食蛋(蛋黃唔食),所以煮餸我好少用蛋。今晚因為焗魚要用蛋白才去買蛋。
蛋叔:「係呀!我啲全部一級靚蛋,如果唔靚果啲,早上買、晚上經已變左壞蛋!」
佢賣蛋梗係讚蛋靚啦!不過,我相信一般人如果要買蛋,理論上應該去呢啲專門店買;正因如此,佢啲蛋去得快,便自然較新鮮!
如果屋企有女傭,主人可能會要佢地幫趁超市,貪佢有單有據。但係響超市買蛋,對我嚟講好麻煩---依家一盒蛋有成十幾隻,幾時食得完?而且我試過響超市買蛋,一個星期都唔夠經已變壞!除非你咁好彩撞啱佢剛剛入貨。
壞蛋?我一個經已夠啦!
你地屋企年輕人多吖馬!
我屋企啲食客,食鷄蛋最快。
香港以前都有架, 而家仲有無架,唔好比我知同見呀!
Cat:果啲好嘢嚟架!
以前響所羅門試過有土人上門賣雞蛋,幫佢買左一籃,點知打開,隻隻都有雞仔響入面,嚇到我手都軟晒,果時唔知有所謂雞仔蛋架!
我女兒在超市買一種唔知叫咩既蛋,話果隻蛋無激素喎,唔知真定假。我地食很多蛋,無機會等佢變壞。