養鴨仔

今日講衰嘢，兒童不宜！(PG家長指引)

上星期與教育界朋友入新界食晏，我從大圍搭律師順風車入三門仔，她的一位從英國回港旅行的朋友與我們「同車」，條路咁長、響車度梗係雞啄唔斷啦！

呢位朋友是中國人，但長居英國，所以廣東話不太流利，講嘢好多時夾離左英語，有時我同律師用廣東話講完、又要用英文同佢解釋一次。

我問律師：「你依家都半退休，閒時做咩嘢？」律師依家英國、香港兩邊走，佢好喜歡英國生活。

律師：「學氣功同跳舞囉！」咦！氣功，我都學過喎---咁咪講氣功囉！

朋友：「氣功英文係咩嘢？」

律師：「Qigong。」

我答：「直譯架！冇英文名。」對律師講：「不過，跳舞好易出事喎！」

律師：「我跳果啲係Line Dance(排排舞，集體跳)，好好玩，冇問題架！」

我：「咁都好啲，如果跳社交舞(要有拍乸果啲)而夫婦唔一齊學，好易出事。依家好多香港上左年紀嘅女士(講我？)響深圳名為學跳舞、實則「養鴨仔」，好弊！」聽完上文下理，律師梗係明白我講緊咩嘢啦。

朋友：「咩嘢係養鴨仔呀？鴨咪係Duck！養鴨仔好好玩嘅咩？」

我：「你知唔知話人地做「雞」點解？」朋友冇答。

律師：「即係prostitute(妓女)！女嘅叫雞、男嘅做果啲嘢咪叫鴨囉！」

我：「有陣時過關聽倒啲女人響度讚自己養果啲鴨，仲建議朋友夾份養埋同一隻，真係聽到毛管動！」

律師：「唔係馬，咁公開？」

果日食完午飯去到科學園飲下午茶，我地又講番呢件事----因為校監、校長不同車，冇聽倒。

我：「阿E(朋友)唔明咩嘢叫做養鴨仔喎！」

L校監：「咩嘢叫做養鴨仔？」吓！原來佢都唔知？不過，俾少少提示就明啦。

我：「你上次北上操完曲，有冇響上面食晚飯吖？」

L校監：「有！」

我：「咁你冇冇留意吓隔離左右坐左啲咩嘢人吖？」職業病---我都話我仇家多架啦！出街食飯我盡量揀靠牆嘅位置，同埋一定望吓隔離左右坐左啲咩嘢人！萬一真係俾人追斬都第一時間望倒吖。「如果果張檯坐左一啲上左年紀嘅女人加兩三個年輕男子、而果啲男子望上去，可以用靚仔(油頭粉面)兩個字嚟形容嘅，雖不中亦不遠矣！

我總覺得男人要有男子氣慨，唔一定係靚！

律師：「難怪之前有報導某金融業女高層因為跳舞養鴨，俾人呃左天文數字嘅巨款啦！咩真係咁好玩咩？」

唉！冇法子啦，男人上左年紀都鍾意搵後生女作伴，以為咁樣會顯得自己年輕左；女人都係咁嘅心態啫！