擺人上檯！

我一向唔鍾意玩facebook，開左個戶口祇係要嚟睇吓朋友動向，基本上我唔會響度寫嘢，我覺得佢攪到人冇晒私隱！

雖然我每次咁講，都有人話你可以淨係俾啲嘢某些人睇，咁咪冇問題囉！但係最近發生左兩年事，令我深信我嘅睇法係正確嘅。

呢幾日無端端有十幾覆我，接受我邀請成為facebook friend；問題係我從來冇邀請過佢地，雖然大部份都係唱粵曲嘅朋友，都唔代表我想同佢地做朋友架馬！好似黃？？咁，我真係敬而遠之啦！依家人地話接受我做朋友，又未有發生事，刪除佢地又好似有啲不近人情咁！

另一單嘢，我較早前都講過，有一位曲友最近俾佢老師逐出校門。無論誰是誰非，我個人覺得緣盡就算，分手後亦冇必要惡言惡語，香港咁細，山水有相逢啫！可是，曲友總覺心心不忿，於是另起爐灶(佢一向都唔祇一位老師嘅)，專登響舊果位老師開唱局嘅同一時間，攪左另一個唱局，仲專登叫果啲響舊老師度操開曲嘅曲友去佢個局唱；不單如此，佢仲加多句：「唔嚟操曲都唔緊要，散左局我請大家宵夜。」

我時運高，果日唔得閒去佢個局操曲！當晚佢地叫埋果位做頭架嘅老師影左張大合照，又叫另一位曲友上載facebook，然後佢自己又留言讚到佢果位老師天上有、地下無！

大家知唔知有咩嘢問題？

問題係佢走左之後，不斷勸其他同學過檔。過唔過檔每個人有自由，據我所知，都有十位八位曲友跟佢走左，但係有幾位唔想走，佢地覺得現時位老師較好！不過，因為當晚有宵夜食，好多人即使冇曲操都走左去食宵夜，但係冇諗過張合照會上左facebook！呢個動作真係盲嘅都知咩嘢事啦----迫果啲仲考慮緊走唔走嘅人下決定！因為響佢圍內facebook friend度一定有人將呢張照片俾舊果位老師睇，老師就會認定呢班人係叛徒，咁你即使再跟佢學、佢都未必會真心教你(佢地都係上私鐘嘅學生)。

即使係朋友，都未必會天長地久！今日嘅朋友、明日變左敵人，你有冇咁快手響facebook度徹底咁清理門戶呢？結果，好多你唔想俾太多人知嘅嘢，都徹底被公開！

我一向唔會將我同朋友合照放響facebook，亦唔會放於網誌，除非得倒佢地同意！雖然即使未經同意便公開人地啲相，佢冇權告你，但係亦唔代表佢認同你嘅做法！

出「騷」係公開表演，要將影碟上載基本上唔需要當事人同意，但係我一樣會先問准人(真係試過有人唔制架)；當然，問左一次之後，再做同樣嘅事就唔會再問-----問得多人地都覺得你煩啦！