備戰

備戰？咩依家有仗打咩？

對我嚟講，出一次「騷」等同打一次仗架啦。

出騷首要梗係要唱好首歌啦----識唱唔難、要唱得好就難..難..難！我講我自己啫，可能對其他人嚟講一點不難。唱好一首歌好花時間架(更加花錢)；操曲之外，當然係要花心思裝扮自己啦！雖然觀眾入場主要係聽歌，但係你著到唔知似咩嘢、兼且面青唇白咁，點都大打折扣----話之你天生麗質，台上強烈嘅燈光都頂唔住！何況我祇係天生「勵」質呢？

不過，即使花大量金錢響裝扮度，都唔一定成功---始終每個人審美眼光不同！最好梗係錢花得少、觀眾又覺得好啦！

好多女士出騷喜歡租衫著，更多人北上響深圳或東門做衫著，俾得起錢嘅咪響香港做、甚至去名店買現成嘅晚裝囉！

呢方面真係做男人好啲---出騷基本上唔駛化妝、幾套西裝轉換吓經已冇問題。女平麻煩啲----著得女性化、把聲又唔夠平嘅，觀眾都唔知你唱緊平喉；而且拍檔亦唔喜歡拍乸著到咁！始終係女人，一般唔喜歡買男性西裝著(連心態都係男人嘅不在此例)，因此，祇能焗住做衫著。

我響深圳做過兩件晚裝，一件至今未著過(寧願著舊衫都唔著、好極有限啦)；另一件吊帶晚裝(咩嘢款都冇，自己返屋企加工釘上珠片)幾年前手工八百蚊人仔，著過一次咁大把。果次做衫係因為我位女平拍檔堅持大家衣著要襯到絕，用同一幅布做，咁唔一齊做都唔得啦！同真男人唱便沒有此問題。我有位曲友去年響深圳做件旗袍、另外響上面釘片，盛惠人仔二千大圓。

試過響深圳做衫唔滿意，亦試過租衫著，不過亦好麻煩----由揀衫、度身、攞衫、交衫計計埋埋最少走四轉、仲要限時限刻：攞衫、演出、還衫頭尾三日---驚你有機會著多次！

因為怕麻煩，我通常逛街見倒啱嘅晚裝便買定，要出騷咪諗吓邊件啱著囉！咁當然要自己身形冇太大轉變先得，所以經常出騷可以令自己努力保持身形！而且，我亦唔會一件衫著一次，祇要響配飾方面改變吓，一件衫著幾次都唔係問題---鬼叫你窮呀？

下次出騷唱兩首，一首都係著番舊衫。今次做「百花宮主」，心中一早諗定點變件衫。剛好附近開左間改衣店，於是拎件衫落去同老板娘講出我嘅要求。其實我自己都識改(我以前業餘幫人做衫架)，不過自己好難幫自己度身、而且今次改變一定要著件衫上身邊度身、邊改，自己做唔倒！

因為老板娘知我識做衫(聽我講嘢都知啦)，當然唔敢呃我---佢之前計過要用五米花邊，當時我話冇理由要咁多，試衫時證實我講得啱，佢都自動減番錢。佢咁識做，我都識做，呢幾日逐件晚裝拎落去改，咁以後要著就唔駛麻煩！點解要逐件攪？佢鋪頭細，我啲衫珠片又多，佢驚其他衫勾甩我啲晚裝珠片囉！