「Mannings 萬寧」學政府

學政府？咩呢個政府有嘢值得學咩？咪就係好學唔學囉----學政府搬龍門技術！

話說：萬寧好多時都有推廣，譬如買「紫點」化妝品兩件有七五折、更加多嘅係買滿$688可獲現金劵$100。

前者指明係有「紫點」化妝品，我覺得都講得幾清晰；有陣時送嘅禮劵亦寫明祇可用以購買某個牌子護膚品，我都覺得問題不大。

早前，萬寧又有買滿$688可獲$100現金劵推廣。其實要買滿$688對我嚟講唔容易，買藥品甚至化妝品，我好少響佢度買----之前都講過，佢啲化妝品七五折後都貴過人、買藥物亦較一般藥房貴！我惟一會幫趁佢買嘅貴價嘢係別處冇得賣(或者即使有得賣都與佢同價)嘅保健產品，其中一種係「同仁堂安宮牛黃丸」；呢樣嘢即使專門店減價、佢都企硬跟正價賣。因此，我通常會得等有推廣嘅時候響萬寧買。

之前去過最接近我家果間萬寧，我以為自己好聰明架啦，誰知道高一呎、魔高一丈！我買一粒同仁堂安宮牛黃丸(標價$670)加一盒六十多元嘅三冬茶，諗住可以獲$100現金劵。果次收銀姊姊告知一定要買同類產品滿$688先得！我問何謂同類產品？佢講左啲唔知咩嘢嘅貨品---總之就冇一樣係我需要嘅！反正我唔急住買，所以當日祇買左三冬茶。

前日去附近另一間「萬寧」，又係做緊同樣推廣。今次諗住聰明啲，響貨架前按吓計數機(窮馬，慳得就慳啦)，結果決定買四粒「同仁堂安宮牛黃丸」(一盒兩粒($1,340 X 2 )  加一盒「馬百良安宮牛黃丸」(六百幾)，總數應該可以獲$500現金劵。

誰料位收銀姊姊話：「要分單計：一盒兩粒「同仁堂安宮牛黃丸」$100禮劵、兩盒$200、「馬百良」一盒唔夠$688，所以冇禮劵。」咁即係我買三千幾蚊嘢祇得$200禮劵。

我：「何解要咁樣分單？如果咁樣分你地應該寫：購物滿$688可獲$100現金劵，以每件貨品計。」咁即係你件物品成萬銀都好，亦祇獲$100現金劵。

另一位姊姊行埋嚟，同果位姊姊講：「哦！佢買兩盒「同仁堂安宮牛黃丸」加埋可以獲$300現金劵，但係「馬百良」果盒要分開計，所以唔夠$688。」

我：「何解要分開計呢？雖然牌子不同，但同是牛黃丸，冇可能唔算同類產品吖。如果係咁，你地應該寫：購同一牌子的同類產品滿$688可獲$100現金劵才對。」

呢位姊姊又唔答我，結果咪俾得$300現金劵囉！

思前想後：究竟係「萬寧」取巧、定係收銀啲職員取巧？究竟係公司嘅規定、抑或係職員借意俾少左顧客而自己攞左啲現金劵呢？如果係咁，一日咪搵好多錢？我呢個傻婆醒左二百蚊俾佢咯！

人地「百佳」發出現金劵係要顧客簽收架！