兜錘定音

音定心不定

人皆多扭擰

勿謂冇商量

唯君須冷靜

本來大家談北上訪滬談得好端端的、但林大總管失驚無神爆出句兜錘定音出來、以致眾飯民尊貴齊齊翻臉不肯報團。誰知就在此時議事堂主席才子成忽然師父上錯身將兜錘定音解讀為清晰明確。就是這麼樣一氣之下、尊貴們便跑去中區獅子銀行門口瞓街兼罷食、抗議中央未講先落閘。誰知天公不造美、連日來不是滂沱大雨就是冰雹招呼、令到場面冷落、連鬼影都唔多隻、雖有陳大教主到場打氣亦無補於事。正當尊貴們準備提早收檔之際、才子成又出口術、聲稱從來冇講過阿爺會接受不符合愛乜愛物要求嘅人做特首、但今次飯民學乖咗冇人聽佢支笛、一於棚尾拉箱返屋企食餐飽、然後再去報團訪滬。

傳聞指林大總管之所以漏嘴、以及而才子成曲解成語是一種賊佬試沙煲嘅策略、目的是試探江湖上有啥反應。從今次飯民有頭威冇尾陣看來、當年那種一呼天下應的威風已是明日黃花了！其實這也難怪的、皆因近年飯民陣中頻頻爆出醜聞、並且在選舉方面連番失利。剛剛之嘛、某地區讓會補選又被建制派奪去一個席位了！老實講、飯民最大弱點就是對自己友犯規視而不見、見而不罰、罰而不嚴、長此下去、遲早會變成政壇中的弱勢社群。雖則話、好多人都唔想見到議事堂勢力一面倒傾向建制派、但亦不代表選民會投票給那些寬己嚴人之類嘅人物吖嘛！這點你見到、我見到、大概阿爺都見到。

阿爺奉行的是一黨專政、而飯民要的是正黨輪替、基本上大家都心知肚明這是水火不相融的事。若然不信、不妨去查一查、看看世界上有那一個奉行政黨輪替嘅國家是容許有人在它的地頭上搞一黨專政、就知我講嘅嘢冇花假。坦白講、遊戲規則永遠都是由強者來定、要爭取話事權就要看看自己有幾大本事、否則只能按照人家定下的規則玩遊戲。雞蛋抗高牆？唔好玩啦、即使恐龍蛋都頂唔緊啦！吓、一國兩制去咗邊？無損無缺的寫在基本法裡面、唯獨是各方理解不同之嘛！總之免強無幸福、只要大家都懂得點樣去玩、遊戲就可以繼續、無必要搞到反枱吖嘛！啱冇？