電視風雲

王維基打嘅算盤唔響, 所以近日宣佈裁員二百幾人! 唔知道幾時先至有得揀高質素嘅電視節目睇? 亦唔知道王維基可唔可以殺出血路? 不過, 一班信任王維基嘅台前幕後職藝員, 同一班等到頸都長嘅電視觀眾而言, 所得到嘅喺失望呢兩個字! 前者畢竟得罪以前米飯班主, 縱然今日招手回巢, 自己又拉唔拉得低呢個面子?

大部份離巢時嘅職藝人狂數前僱主尖酸刻薄, 因為有新靠山做後盾! 所以講嘢時, 唔多唔少都會過左火位! 由於自己知自己事, 有冇講過籠一定心知肚明. 而家新靠山都靠唔住食言炒人, 仲好唔好意思回巢呢? 回, 又怕日後被秋後算賬; 唔回, 生計成為主要問題! 根據報紙話, 王維基申請司法覆核, 最少要攪一兩年喎!

後者原來擔定櫈仔欣賞高質素節目嘅視迷, 而家對住櫈仔喊都無謂! 唔知喺王維基運滯, 抑或今年年頭唔記得攝太歲. 記得筆者先排撰文寫過, 攪電視喺一場持久戰! 不但人力物力重要, 最主要都喺靠財力行先 而家比政府咁攪一攪, 王維基唔埋亞視堆, 就要將手頭上嘅職藝員合約, 連同經已製作好嘅節目一齊轉售!

電視行業喺銷金窩! 冇雄厚實力, 唔會捱得好耐. 好似七十年代嘅佳藝電視咁, 都放咗好多億落去, 點知都喺飲恨執笠收場! 如果唔喺, 鄭裕玲就冇可能入咗無線做到而家啦! 王維基裁員二百幾人, 亦都喺無可奈何嘅事! 三軍未動, 糧草先行! 日日都要支出, 仲要喺拍一套劇比三套劇嘅價錢! 唔裁員, 睇怕頂得唔耐囉!