道高一丈！

自從移居頭條網之後，一直冇再寫同政治有關嘅話題----可能人離開左政治舞台，對佢興趣減退(傻嘅！我一向都冇興趣架啦，為搵食要強顏歡笑啫)；二來，依家一心祇想做好粵曲推廣，其他事雖未至於不聞不問，但係興趣不濃。

日前，長毛響立法會向財爺撒陰司紙，政務司司長去信立會要求檢討及收緊《議事規則》，以防日後再發生同類事件。

立法會主席曾鈺成認為議員被逐離場已是相當嚴厲的處理。

個人認為長毛響立法會做那麼多令人討厭的事情，祇有以下原因：

一. 語不驚人誓不休----立法會咁多議員，記者一定要選擇性報導，冇一兩句出位言論何來新聞價值；

二. 抬棺材、做紙牌、舉橫額...-----呢啲道具係為佢嘅言論增添戲劇色彩：有聲音、有畫面..，最受記者歡迎；亦因而俾左一班入唔倒無線道具組工作嘅人養活一家；

三. 有邊份工好過佢吖----十萬銀一個月！其他盡責嘅議員(唔講其他委員會會議)淨係每星期開立法會閒閒地都要坐五六小時(仲要保佑唔好有人拉布喎，否則又要唱姚蘇蓉首「今晚不回家」)，但係，長毛每次攪完事，便被罰離場，佢直頭開心到彈起啦！每次開會坐個多小時便可以離開，仲可以大大聲咁同選佢果班人講：唔係我懶呀！係人地趕我出嚟咋。

嘩！有邊份工好過打佢呢份工吖？

所以，罰離場呢樣嘢對佢嚟講，絕對唔係罰則，係正中佢下懷才對！

亦正因此，個人覺得魔高一呎、道要高一丈至得！佢想離場，你偏偏罰佢冇得離場，等佢比死更難受，這才算是罰則！

建議：

一. 日後所有立法會議員(包括旁聽者)入場時全部要搜身。而且為防佢借尿遁，搵人響外邊接應，每次出入會議廳都要搜一次！咁樣做，當然會令果啲行為良好嘅議員或公眾人士引起不便，但係，如果係身冇屎嘅，我又唔怕俾人搜喎！

二. 即使冇左道具幫手，假如佢講粗口、叫囂又如何？罰佢響立法會坐監，直至會議完結為止！去洗手間又如何？搵人好似看狗咁看住佢囉！去飯堂食嘢又如何？都話係坐監咯，要食嘢都要坐響佢果個監倉度食---搵人買俾佢食，不過要收番錢。

三. 會議廳有錄影鏡頭，每半小時影住佢，唔俾佢瞓覺、唔俾佢打機、唔俾佢通處走！

呢啲做法可能要動用多左警力同警衛，但係依家動不動要搵十幾人抬佢出嚟唔浪費公帑咩？最慘係用左觀眾睇落都覺得啲警衛好無能。佢坐緊監，你就唔駛再當佢係議員咁看待架啦！

咁驚唔驚佢啲同黨一同攪事，攪要警方同警衛疲於奔命呢？唉！響立法會，可以做到佢咁wea爛塊面嘅無幾多個啫，你慌啲大狀會咩！