茶包裡的風波

阿蘇因在酒店飲下午茶，要求增加一個茶包，結帳時酒店收她兩杯茶的價錢。她認為酒店小氣(可能最唔高興係酒店唔賣佢帳)，於是利用佢可以響大氣電波講嘢之便，批評該侍應和酒店。

呢件事其實發生了多天，民情主要都係唔認同阿蘇嘅做法---因為當佢向侍應講要多一包茶包時，侍應經已告知要當兩杯茶收費，假如佢唔想，可以唔要！佢祇係恐嚇個侍應：你地夠膽咪收囉！

佢點都估唔到酒店真係唔賣佢帳，收佢兩杯茶錢！個人認為要多一個茶包收兩杯茶錢，事實上係唔公道----一杯茶係一個茶包加一壺茶$45，咁加一個茶包而冇叫多壺茶頂多咪收$80，冇理由乘二囉！但係人地講左要收兩杯價錢你都要，咁就冇得上訴啦！

我朝早食早餐，好多時隨餐有牛油方包嘅，如果要改多士，侍應會告知要加兩蚊；凍飲又加兩蚊-----加加埋埋一份早餐三十幾蚊夠冇理由咯！但係人地先此聲明，你唔接受咪唔食、或者幫趁第二間囉！

事情經已告一段落，今日再講係因為陶先生響佢專欄度講：如果阿蘇唔好叫侍應俾多包茶包、祇係要佢更換壺濃茶，咪可能唔駛加錢呢樣嘢。

經一事、長一智。如果我係間酒店負責人，我會更改個Menu，講明茶(一個茶包)？錢一杯、濃茶(兩個茶包)？一杯、特濃茶(三個茶包)？一杯。唉！鍾意飲濃茶咪去茶餐廳囉！我成日覺得啲有錢人幫趁果啲所謂高檔場所，食物質素好多時比普通餐廳還要差！不過，人地有錢，佢鍾意幫趁高檔嘢唔關我事；鬼叫我窮呀！唓，有錢又無謂因果幾廿蚊而犯眾憎啦！