吃與不吃、公與不公？

潮發粥麵茶餐廳各款單併粉麵如魚蛋麵或雲吞麵等，每碗42元；如選擇淨食（不要麵底）則更貴，不只淨牛腩，連淨魚蛋、淨雲吞都一律99元。

記者在午飯時間光顧試食，約600方呎舖面幾乎爆滿，近半是操普通話的內地客。記者點了一碟淨魚蛋魚片、八寶湯及牛腩麵，埋單220元。其中最貴的淨魚蛋魚片，有八粒魚蛋及八塊魚片，索價99元，平均每粒魚蛋要6元，味道一般；牛腩麵有三至四件牛腩。記者詢問同枱一對自由行旅客，會不會覺得價錢太貴，她們笑而不語，吃了一口後才念念有詞說味道一般。

同區其他粉麵店（見表），淨魚蛋魚片的價錢約30餘元，魚蛋麵同價；至於港九多間以魚蛋馳名的粉麵店相比之下顯得「抵食」，筲箕灣安利魚蛋粉麵的淨食（走麵）共六粒魚蛋及四塊魚片，每碗26元，平均每粒魚蛋2.6元，遠較潮發便宜。連鎖店大快活近日也推出魚蛋魚片湯河，連飲品每碗42元。知名飲食博客「為食龍少爺」早前光顧潮發，看到餐牌後大嚇一驚，在網上留言指「以為自己眼花」、「絕對相信它是專做遊客生意」。他說該店魚蛋味道普通，「個人覺得係貴」。

記者向潮發負責人查詢，她指因舖租高昂，故食物售價「一年比一年貴」，又表示五年前搬到現址，當時租金十餘萬元，後來突然加租至現時的逾20萬元，加幅逾倍，並強調餐牌明碼實價，沒有欺客。

中原地產區域營業董事陳國坤指，五年前樂道一個600餘呎舖位，月租約8至9萬元；至附近iSQUARE落成，各大型連鎖品牌進駐毗鄰的北京道及海防道，「一間舖租都120、130萬」，帶動街舖租金起飛，現時月租動輒近20萬元。「呢啲舖頭惟有密密做（生意），甚至純劏客，如果唔係好難頂得住」。

我見：

與其說是受惠於自由行，不如說是受害者才對！

又發奇想啦！去公立醫院睇急症，咪寫明港人收一百蚊、非港人收九百九十蚊   嘅；你去醫院餐廳食飯，咪又寫住同一樣食物，職員價幾錢、非職員價又幾錢嘅；又或者你去啲高等教育學院，又會寫住持學生證者幾錢、非學生又幾錢；再者，如果你去何文田果位互助叔叔間鋪度食粥，長者咪唔駛錢嘅.....

既然如此，食肆何不在餐牌上寫明港人幾錢、非港人幾錢呢---依家港人出街一定要帶身份證；冇帶？咁咪用非港人收費囉----唔告你冇帶身份證出街算俾面啦。

咁樣做會唔會俾人話岐視呢？喂！係政府帶頭做先喎-----我唔係反對咁做法，咁做係啱嘅。冇咁多自由人、睇急症唔駛等十個八個小時、鋪租唔會咁貴、食物又唔會變成物非所值。食物咁貴關港人咩嘢事呢？何解要成為犧牲品？如果自由人覺得貴佢咪唔好幫趁囉----如果係咁，鋪租隨市場需求調節，又會低番啫；如此一來，食物價格一樣會低番啫！

我甚少外遊(都話窮咯)，但係我外遊如果自由活動，我都鍾意去啲當地人先會幫趁嘅小鋪食嘢，同遊客區差一大截架----唔單祇係價錢，食味更地道！

自由人都可以架，如果佢地唔係為左買名牌包包，又唔駛集中去尖沙咀區啦。所以我之前講響打鼓嶺、沙頭角設自由行「濕平」勝地，都唔係天方夜譚嚟，如果真係有個咁嘅旅遊勝地，裡面梗係要有一條龍服務(最緊要係多啲洗手間，唔駛咁華麗架，反正佢地席天幕地都去得倒，祇要有馬桶同沖水設施就得)、食肆梗係唔少得(殺到佢一頸血都得，方圓數百里都冇嘢食)、奶粉、名牌包包、化妝品、零食手信....總之佢地要咩有咩，一應區全，不假外求(死啦，咁講法廟街同大富豪駛唔駛搬埋去呢)！如此一來，咪少左好多不必要嘅衝突囉！