還原反本

呢期 Miss Van 上身，又講成語啦！

【名稱】：還原反本

【釋義】：回復到事物的本來形態。

有句說話講人一生的三部曲----細時四隻腳(爬行)、大時兩隻腳、老時三隻腳(需用拐扙扶持)。

響現時居所住左十幾年，一座樓十五層，一層八伙，戶數唔多，電梯兩部分雙單數。我住的那層剛好兩部電梯都可以用，所以整座大廈出入的人我都有機會遇見。

有些街坊，你跟佢點頭叫「早晨」佢會應你、有些冇反應---叫幾次都冇反應咪算囉！十人生九品，若要人似我，除非兩個我。

有些街坊很健談，傾得多、自然認識深左。大廈的管理員住在我上面果層，可能因為出入都係街坊，所以遇到要幫手，佢都義不容辭。

早幾年，樓下有位阿婆，見佢經常都係一個人出入，自己買餸煮飯。傾談得多，有次佢仲叫我去佢屋企食飯添----現今社會，去親戚度拜年都唔會留你響屋企食飯啦！話雖如此，我又點好意思叫位非親非故嘅老人家煮飯俾我食吖！

曾幾何時，前年見呢位老人家經已要用拐杖出入，去年開始，更請了印傭用輪椅推佢出入。唉！人生四部曲，佢經歷晒啦----咩唔係三部曲咩？何解係四部曲？

今早出門食早餐，見管理員正在大廈門外拉著鐵閘，讓幾位坐著輪椅、或推著腳架的長者進入大廈；望望這幾位長者，都是平時見慣見熟的幾位長者，甚麼時候要用輪椅、用腳架呢？仲有成四五位咁多！

唉！人生第四部曲咪係「還原反本」----用番四隻腳嚟行囉！尚健壯嘅用四隻腳嘅腳架、健康更差嘅用四個轆嘅輪椅。

看後令人唏噓！真係得快樂時且快樂----唱得幾多得幾多！唔知幾時唔可以北上，唔知幾時開口唱唔倒歌、唔知幾時....