知多一點點！

尋日早上去旺角覆診，跟住去太子上課學「阮」。

平時上課可以用老師提供嘅樂器，唔駛自己帶；但係上一堂老師話我依家「叻」左，應該為我個「阮」加番個擴音器，所以尋日要帶埋自己個「阮」上課，請老師幫我加工。早一晚盤算緊究竟拎埋個「阮」去覆診，跟住行去太子好、還是覆診完返家再拎個「阮」上課。

最後都係決定拎埋個「阮」去覆診，否則舟車有延誤，就有機會遲到！呢樣嘢我最討厭，我唔喜歡遲到、亦唔喜歡人家遲到！

每次覆診前都要先抽血檢驗，上星期經已抽左血。今朝見醫生前先量血壓、體重，姑娘話我血壓度數冇得頂。跟住入房見醫生。

醫生(睇住我份驗血報告)：檢驗結果一切都好好喎！你身體有冇覺得咩嘢唔舒服。

我：你之前同我講，有些人吃了膽固醇藥會肌肉痛；我呢一年都覺得腰骨痛，關唔關事架？

醫生：唔關！到咁嘅年紀，你問十個人、有九個都有腰骨痛問題架啦。

我：我見腰骨痛嘅時間，與開始服用膽固醇藥差唔多時間，所以一問啫。」

醫生：有冇覺得心翳？

我：冇呀！不過，最近我好幾位朋友心和血管都有事，但係事前完全冇symtom(跡象)喎！

醫生：係呀！如果自己都感覺倒有事，經已好大件事架啦！

我：咁咪防不勝防！

醫生：所以咪要留意膽固醇囉！血管閉塞都係因為膽固醇之馬。你食左藥，依家總膽固醇得三點幾，好好吖！

我：佢地都有年年做body check(身體檢查)，佢地話三高都冇問題喎！

醫生：咩嘢叫做冇問題先？係醫生講、抑或佢地自己講先？上左年紀嘅人，膽固醇5.2就應該食藥，但係佢地好多人都自以為冇問題，唔肯食藥！

我：好難講嘅，冇人鍾意食藥食過世架。

醫生：你呼吸夠一世咯、你飲水夠一世咯！(好寸啫)

我：呼吸唔駛限時限刻、飲水唔會死人吖馬！

醫生：邊個話飲水唔會死人？(跌左落海、唔識游水飲水死都算？)

我：但係所有藥物都labelled as poison(標籤住係毒藥)喎！而且一世流流長，太多藥要食、如果咁啱又有其他病，又擔心啲藥相衝啫。

醫生：基本上，依家開嘅藥都唔駛擔心呢個問題；如果真係有問題，我一定會講嘅！

我：有陣時睇中醫，食緊中藥又要避開啲時間！

醫生：(好明顯，佢完全唔信中醫)唔好以為食中藥同西藥嘅時間分開就冇事。如果一個人食緊薄血丸(佢講明唔係通完波仔食果種----佢有講個名，不過我聽唔倒係邊隻藥、亦冇必要深究)，又食某些中藥係會死人架(有真實個案)。

我：咁咪係囉！如果冇長期服食某些藥物，咪唔駛擔心呢樣嘢囉！

醫生：你淨係血糖偏高啫！

我：咁係咪要食少啲糖？我經已食得好少架啦！

醫生：唔係。係要保持體重唔好上升，你經己保持得好好，如果可以再減啲磅數就更好。好多人過時過節、暴飲暴食，過後就出事架啦。

我：放心！我絕對唔會暴飲暴食，以前份工過時過節會出現你講嘅問題(唉！我成日話：我係因工受傷架)；以前食晒我呢世人啲配額，依家要節衣縮食----過年如過日！

醫生：如果血糖去到七就要食藥架啦！不過，就算真係去到七、我都會隔段時間覆驗確診先會叫人食藥嘅！不過，如果你保持倒、甚至再減倒磅數，就唔須要擔心。

其實去年醫生叫我食膽固醇藥時，我都好抗拒----因為好多朋友膽固醇度數比我高，佢地嘅醫生(政府醫生)都冇叫佢地食藥！不過，依家睇嚟，我個醫生似乎係啱嘅(佢當時經已同我講：如果你四十歲以下，膽固醇6.2我唔會叫你食藥；但以你依家嘅年紀，膽固醇控制得唔好，就會引起其他更嚴重嘅問題----當時我半年內減左十磅，但係膽固醇依然去到6.2；醫生話咁樣證明左我自己嘅新陣代榭慢到自己解決唔倒問題，所以先要用藥物幫助)！我唔係醫生，不過我覺得佢講嘅嘢好有參考價值。