廚房小幫手

經常自己煮食，有些工具是不可缺少的！

有冇買過粉葛煲湯？有冇發覺同舊粉葛搏命係一件苦事？我同Amway嘅刀同剪有成廿年，但響呢方面佢幫唔倒手；呢幾年流行嘅陶瓷刀，一樣幫唔倒手---陶瓷刀切肉冇問題、切骨都唔得啦！

我住呢區好多散貨場，通常都係三兩日左右就轉一轉！如果你買左件衫唔啱，拎番去換都可能轉左第二檔。間中有些是賣海味乾貨----我嘅意見係：呢啲貴價嘢，假貨甚多！豉油、鹽呢啲平價嘢都有假貨啦，所以買呢類嘢，無謂響呢類散貨場冒險咯！

早兩日行過，見示範緊一種聲稱係韓國製造嘅刀---刀上都有韓文，當佢係真先啦！佢示範緊用果把刀切粉葛(係切呀！唔係斬)同切骨，再用隨刀附送嘅三件用具示範：刨絲器、刨皮器同埋切蔥絲器。我自己都有刨皮器，吸引我嘅係刨絲同果把切倒粉葛嘅刀。價錢唔算貴，把刀加埋三件小工具賣一百蚊！

心諗：買把陶瓷刀最便宜都要六七十蚊啦！呃我呃盡都係一百蚊啫。於是買左一套，我要佢即時開左把刀切一次俾我睇，證實冇問題先要(以小人之心度君子之腹：我點知會唔會淨係佢示範果把刀先切倒架)。

今日專登買舊粉葛煲湯，一於舉行「開刀儀式」，果然輕輕鬆鬆就將舊粉葛切件，仲好齊整添！不過，呢把刀好利，要好小心擺放。

至於切骨，暫未試過。至於佢耐唔耐用，我亦唔知；不過，暫時我對佢都幾滿意！