政黨勞動日

今天是母親節，相信好多為人母者，今日休息，出外晚饍；不過，相信亦有唔少家庭，喜歡一家人響屋企食飯過節。結果，變成母親的勞動節！

不過，能夠一家人齊齊整整、平平安安坐埋一齊食餐飯，即使係辛苦啲，相信為人母者，亦都煮得好開心嘅！

今日要自煮都唔容易！原來街市有四成商戶休市----有咩出奇喎！佢地當中好多都係母親嚟。

但係，你知唔知今日最辛苦係那些人？係政治人物。

何解？難道母親節比農曆新年、甚至中秋節隆重？非也.....

農曆年，政治人物成個正月攤開嚟做佢要做嘅事、中秋節最少都有迎月、賞月同追月三日、但係母親節得一日，祇可以響呢日做嘢！

今早行出街，真係要披荊斬棘----差不多個個街角都有唔同嘅政治人物同佢地嘅義工響度派康乃韾。如果你要攞，打個白鴿轉隨時收倒一打！

我份人好衰(呢樣嘢唔駛我講大家都知啦)，假嘅花我唔想要、真嘅花要我從唔啱政見嘅人物手上收取我唔會要、啱政見人物手上我都唔會要，我認為留番俾更有用嘅人好過！

講真，我絕對唔會因為收左佢地嘅花或者其他禮物，影響我嘅投票意向！相信政治人物亦都明白，祇不過如果一千人當中有一個會因此而投佢地票、咁就經已賺左！

所以，過時過節派禮物呢樣嘢，對政治人物來說，真係食之無味、棄之可惜！因為人人都做、你唔做就好似打麻雀咁---蝕張！

講開又講吖！屬於民政事務總署管轄嘅社區會堂/社區中心，理論上當初係為街坊提供一個可供舉辦大型娛樂活動的場所；以及在天氣惡劣時(避寒、避暑、避風)作為附近無家可歸人士的臨時避風雨之所。曾幾何時(咪1982年成立區議會後囉)，變成區議員、或跟區議員有緊密聯繫的團體專用場所？

依家要申請呢啲場地，如果你唔靠攏一些當地議員，基本上唔駛遞申請！當然，如果我想申請這些場地，要搵位議員幫手唔難，但係因為咁而要將自己同某些議員掛鈎唔值得----無論大家政見幾相似，我都唔會百份百認同佢地嘅意見！

當然，佢地申請嘅條文冇講呢樣嘢，但係實情如何？你試吓咪知囉！