雲耳勝瓜炒鮮百合

鮮百合好味又有益，有清心潤肺，養心安神得作用。

雲耳早兩日先講過，佢味甘, 性平，有補氣血, 潤肺及活血的功能；肉質滑膩, 柔嫩鮮美, 風味獨特, 用為輔料, 可烹製出多種美味菜餚.

絲瓜則含有防止皮膚老化的B族維生素，增白皮膚的維生素C等成分，能保護皮膚、消除斑塊，使皮膚潔白、細嫩，是不可多得的美容佳品，

依家將佢地三個夾埋一齊煮，咪一字記之曰：齋囉！

材料：

勝瓜(絲瓜)一個去硬皮切滾刀塊

雲耳幾粒浸軟飛水

鮮百合一個

甘筍花(要嚟扮靚啫，冇就算啦)

一. 燒油爆雲耳，下勝瓜爆炒一會(如有甘筍花，可以同下)，加少許上湯(冇嘅咪水囉，不過水一定要加鹽，用左上湯、又食得淡嘅可以唔落鹽)煮一會。

二. 下鮮百合一同炒熱上碟。

註：

一. 鮮百合可以生食，所以不要炒太長時間，太熟，不爽口，不好食！鮮百合也可用來煲湯，等啲湯煲好才落，煮得耐會溶晒。

二. 勝瓜不宜煮得過諗，要炒得爽口先好食。

三. 雲耳浸後如果都幾稔，唔出水都得(當然要去左啲沙)。但係有些雲耳即使浸開都好硬(似木耳)，那便一定要出水，否則唔好食。

四. 鮮百合同鮮蓮子用嚟煲糖水都好好食。但鮮蓮子煮的時間較鮮百合長，不太適合用嚟煮呢個餸。