妃子笑
2014/05/26 10:00:12
網誌分類:
講飲講食
呢輪行街,見生果檔有啲綠色嘅荔枝,叫做「妃子笑」。
坦白講,如果抱住係以貌取人嘅心態,我一定唔會買嚟食!我印象中,荔枝應該係:紅布包白布、白布包豬膏、豬膏包紅棗架馬。
前日北上。有上深圳曲社操曲嘅朋友都知道,響操曲期間,會有人入嚟曲社叫賣雞呀、糖水呀、生果呀之類嘅嘢食。往時,有些曲友對啲雞(熟左)情有獨鍾,有陣時仲買返屋企食;不過,我曾經聽聞有人返屋企食果陣發覺啲雞變臭---可能係天氣太熱、焗壞左掛!呢年多唔見有人嚟賣雞,可能係因為禽流感也不定。依家最多係賣生果。
前日見個男人挑左籃生果入嚟,有牛奶蕉同荔枝;果個小販又話佢果啲係妃子笑。講真(又係以貌取人),佢果啲較我響香港見倒果啲靚女好多---青綠得嚟有撻深紅色嘅面珠揼。
當時得芳芳嘅朋友SF同我響出面,我同SF講:呢啲睇落靚過香港果啲喎!SF告知:「妃子笑」係應該綠色嘅,如果見倒紅色,果啲荔枝會酸。佢嫌糯米糍肉質太稔,所以佢鍾意食妃子笑。佢咁樣講,我相信佢對呢種荔枝有啲研究掛!
左面係青綠色嘅、又面係開始變紅色嘅。
查:妃子笑:四川叫鉈提,台灣稱綠荷包或玉荷包。妃子笑的特點是果皮青紅,個大,肉色有如白蠟,脆爽而清甜,果核小。傳說當年唐明皇為搏楊貴妃一笑,千里送的荔枝就是妃子笑。
以前講荔枝,不離黑葉、桂味同糯米糍,當然仲有增城掛綠啦!
為左追尋真相,今日用廿五蚊買左兩磅---今日見果啲經已有好多變紅。買果陣隔離有位阿婆同我講:佢雖然青色,但係好甜架!
試後:SF冇講錯,帶紅色嘅有啲酸。所以俗語講得啱架:人(同生果)都不可以貌相。
我好少食茘枝。
我都係即管試吓啫!荔枝易上火,我唔啱食。
我勁鍾意食,呢兩年無買,前日在細女家見有全綠的很甜!今日生果佬都有黎,我食左兩粒,綠色很甜,有紅色果粒少少酸。
鐘意食但唔識揀,而且一食唔停得口,所以唔會買。
鍾意食,但唔會自己買,因為唔識揀。
荔枝,我的至愛!