不做陪審團！

等候多時的「新地案」終...終....終...於開審啦，「貪湯案」又唔知要等到幾時，係咪要等到關鍵人物都唔響度、然後不了了之算數呢？

尋日幾經艱苦，終於選定左陪審團。被選做陪審團都好慘，遇著這些一審便幾個月的長命案，真係會攪到人都瘋狂！

根據香港《陪審團條例》中的第4條列明了作為一名陪審員的資格需求。

• 香港居民
• 21至65歲
• 有良好品格
• 具有對審訊進行時將所採用的語言有足夠的知識及理解能力 (即中文或英文能力)
• 精神健全
• 無任何使之不能出任作陪審員的失明、失聰或其他殘疾

記憶中，以前當公務員都可以豁免；其後改左例，跟住我好多同事都曾經當上陪審團，唔好彩嘅做過好幾次添！不過，唔知點解，我咁耐都未做過----有人同我講，可能我曾讀過法律，如果我聽審會加上自己所知的法律知識做判斷，唔適合當陪審團喎！但係，如果我咁唔好彩響六十五歲前俾人抽倒當陪審團，我都有大條道理申請豁免------你睇我寫啲嘢，都知我精神唔健全啦！

除此之外，即使選中你(呢個世界，真係好嘅唔靈醜嘅又靈架)，被告人都有權反對你做陪審團：

在刑事公訴案件中，被提審的人(即辯方)或其代表律師和執法機關(即控方)或其代表，均可向即將準備出任該案件的陪審員作出詢問。辯方可根據陪審員的回答或表現，在附上合理的解釋下，提出不限次數的有因由反對，將該準備出任是次案件的陪審員剔除並禁止參與是次案件。另外，《陪審團條例》第29條更給予辯方最多5次的無因由反對(pre-emptive challenge)，即辯方可以在沒有合理解釋的情況下，剔除並禁止不多於5名的候選陪審員參與是次案件。控方也可以如辯方一樣，可以對候任陪審員作出不限次數的有因由反對，但卻沒有權利作無因由反對。

最簡單莫如審理強奸案件，如被告是男性，多會反對由女士出任陪審團----女人幫女人，判佢有罪嘅機會好大！果啲咁嘅人，見倒我呢個正義凜然個款都嚇死啦，點敢俾我做陪審團！

一單審理期咁長嘅案件，係人都唔想當陪審團啦！所以尋日啲人都俾左好多唔同理由希望可以豁免----出左機票旅行、英文唔好、照顧BB、認識被告......有幸嘅獲豁免、冇幸嘅維持原判---喊都無謂！

有陣時都好唔明白，我有一段時間天天去法庭聽審(果陣讀緊法律)，法庭上由法官、律師、原告、被告...全部都係中國人，偏偏成個審訊都係用英文，因為咁而需要有法庭傳譯，係咪攞嚟攪兼攞時間嚟吖！