好事多為！

昨天一早(仲未落床)便收到舊舊舊同事(因為響政府退休後，都做過兩份工)的whatsapp短訊：

Van姐：剛收到升級確認信，多謝你一直支持和指導，稍後請你吃飯。

果陣醒魂未定，淨係知道有人要請我食飯。

清醒後，心諗：佢升級關我咩嘢事呢？佢雖然曾經與我同一辦事處工作，果陣我高佢一級，但她屬於另一組，不是我下屬！我從未寫過佢嘅考勤報告，因咩嘢事要「龜婆」於我？

回心諗：我與她雖然響廿年前曾經在同一寫字樓工作大概一年左右，但其後(甚至我退休後)佢每隔幾個月都會約我食飯聚聚；佢與我其中一位男友現在同一辦事處，我男友亦曾告知我，佢都覺得奇怪：因為每次呢位舊舊舊同事提起我(邊個背後冇人講吖)都見佢肅然起敬！

先此聲明，我係文職人員，見面唔駛見禮架。

昨日細心諗吓：人家要「龜婆」你、都要諗吓你曾否好事多為至得架！諗唔明、食都食唔落---正所謂無功不受祿：AA制又唔同。

諗吓諗吓....我諗應該係咁：

我份人好衰！工作上，不論何人，祇要人家問到我，我一定知無不言、言無不盡。好得意----我地嘅工種，好多人有困難唔敢問自己上司(又或者問佢地都唔識答)，所以有我呢個傻人咁就手、又包唔會跣人，因此經常有隔離左右同事嘅下屬走嚟問我攞資料或意見。可能係呢個原因掛-----哈哈！終於諗倒個藉口食免費餐啦。

雖然我生得個樣衰咋！祇要與我相處過，都知我真係得個惡樣咋----「哎呀大仔」話我係鱷魚頭、老襯底，我又唔認同喎！我係天生厲質，我會唔蝦人、但其他人亦唔好諗住可以蝦我----可能前半生俾人蝦到貼地，後半生要反彈啦！

所以，千其唔好諗住我好蝦呀！我淨係打麻雀，先俾人呃倒錢架咋。