乳酪炆雞

響舊網都介紹過類似嘅餸，今次最大分別係：一. 用左法國BB雞；二.唔記得買九層塔；三. 唔記得買檸檬，用左現成檸汁！咩嘢都唔記得----腦退化呀？

材料：

法國BB白雞一隻斬件

洋蔥一個切大件

甘筍一小個切滾刀塊

原味乳酪一杯

紅椒粉(唔辣果種)

一. 雞件下鹽、檸汁及生粉少許醃一會。

二. 燒油爆洋蔥及甘筍，炒一會撥埋一邊。

三. 下雞件略煎兩面，然後與洋蔥及甘筍炒勻，下紅椒粉炒勻，下水至材料一半位置，可下少許鹽。蓋上煮至滾收細火，煮一會至甘筍稔、雞熟，熄火，下乳酪拌勻。

註：

一. 因為冇落九層塔，外形冇咁靚仔！喜歡嘅可加少許青豆一齊煮。

二. 乳酪較花奶及忌廉健康，當然喜歡的亦可以落忌廉或花奶代替。