物理治療

今次因為跌傷腰骨，西醫寫紙做物理治療，才第一次接觸西式嘅物理治療，反而中式嘅物理治療，我廿年前經已接觸啦！

廿年前因為左手經常麻痺，無情情食食吓飯，拎住碗果隻手不受控制，差點連隻碗都掉埋。西醫、醫院睇勻(果陣係公務員、梗係睇西醫啦----唔駛錢)都唔得；西醫話我係網球手(我都唔識打網球)、醫院話我神經線發炎(再醫唔好我真係神經咯)，淨係俾止痛藥食：我係麻痺、唔係痛呀！

最終係一位中醫師用中藥加埋中式物理治療醫好左。所謂中式物理治療(果部機叫做脉沖治療儀)，其實係用類似針灸嘅方法醫治；祇不過好多人一聽倒針灸就驚、更加唔會接受枝針拮落嚟啦！用呢個方法一般人都可以接受。但係呢個方法治標唔治本，幾年後又翻發。當時又有人介紹我睇跌打(冇法子啦！放左工好難搵醫生睇，無論中醫定西醫)，我每到一個區工作，都會有啲熱心人士關心，知我唔舒服就會介紹果區好嘅醫生俾我，即使辦公時間去睇都唔花得太多時間。結果都醫好左---不過我都係寧願做物理治療，因為睇跌打，背部敷左藥、連穿回衣服都有困難！哈，奇怪，之後竟然冇再翻發喎！

今次剛跌倒、又照過X光之後，我都問過相熟果位中醫，據佢講：中式物理治療對於經已彎左嘅腰骨係冇得治療嘅(意思係彎左、冇得整番直)，而且響我嘅情況，既然可以有保險索價，當然應該接受西式物理治療。

今次西式物理治療做左八次，我估計仲要做多兩次。不過好彩，漸入佳境啦！最初深呼吸都痛、瞓覺打昂瞓又痛、打側瞓又痛！所以早前果兩個唱局和6月1日個「騷」、我真係冒住生命危險架---一路唱、一路痛！依家終於好左好多---深呼吸唔痛、打昂瞓又痛、淨係轉側時有啲痛。

治療師同我講：物理治療祇係針對我目前有痛楚嘅地方，長遠嚟講你我要自己每天早晚做幾組針對性的拉筋運動。

兩者比較，我覺得西式和中式物理治療雖然用嘅儀器唔同，但係原理係大同小異---都係熱敷、穴位治療同推拿(西式叫做「手法治療」)。推拿係針對痛嘅位置嚟推，即係痛上加痛啦！好彩我一向忍慣痛---即使好痛，我「哼」都唔會哼一聲。

治療室係用布帘間隔嘅，所以隔離左右對話聽得一清二楚。嘩！有次聽見隔離位仁姐，叫聲淒厲；心諗：都唔係痛成咁馬？(好彩唔係第一次做就聽倒啫，否則可能要打退堂鼓)後來聽果位仁姐同治療員講，才知道原來佢唔係痛，係做緊果啲完全唔痛嘅治療，祇係佢怕癢！