五/六十年代國語金曲

2014/06/12 10:12:16 網誌分類: 音樂

12 Jun

上星期換左部手機：舊果部叉電有問題，而且接聽唔倒留言！

買電話果陣，我跟店員講：你同我設定晒我要用嘅嘢、我咪幫你買部機囉！

我一向都係響電訊公司出機，但依家發覺出機雖然係0機價、但係月費偏貴，而且要用佢指定型號手機。今次抱住：如果店員可以幫我設定晒啲嘢，我寧願買機、然後可以享用較便宜嘅月費(人窮係咁架啦)。

店員聽見我咁樣講，好努力咁幫我攪「機」，真係攪左成個小時---抵！

拎左部機返屋企，更係先設定自己喜愛、又唔會通街都有人用嘅鈴聲啦！搵吓搵吓，居然俾我搵倒首「夢醒時份」喎！早前我響網誌都講：呢首係我心目中嘅十大國粵語金曲之一，最好係佢較舊，冇咩嘢人會用果度好吖馬。

我當時所講嘅金曲，都係八、九十年代嘅，難道之前冇？當然唔係！祇不過八、九十年代我喜愛嘅金曲都係言之有物，有些可能觸及心中痛處，所以有共鳴；一些歌曲亦道出當時港人心態，所以大家亦有共鳴！

至於以前的舊歌，當年吳鶯音與白虹、白光、龔秋霞、李香蘭、姚莉和周璇合稱「七大歌星」，紅極一時。

吳鶯音較為人熟悉嘅有「岷江夜曲」

和「明月千里寄相思」

周璇的「四季歌」

「送君」

白光的「魂縈舊夢」

「嘆十聲」

姚娳的「春風吻上我的臉」

「蘇州河邊」

龔秋霞的「秋水伊人」

李香蘭的「夜來香」

至於白虹，真係唔多認識！

上述嘅都係旋律優美、歌聲甜美嘅國語歌曲，亦係我年青時經常唱嘅歌；但係依家嚟講，我覺得呢啲歌冇咩內涵(咁樣講可能得罪好多人)----祇不過果個年代嘅社會，男女接觸甚少，真係一見就鍾情，所以那時的歌都是情情愛愛、哥呀妹呀咁，所以冇咩嘢特別！以前愛情真係好簡單，邊有現代愛情故事咁複雜！

但係細個果陣，得閒除左唱歌，都冇咩嘢好玩---唱歌又唔駛洗錢嘅！我啲普通話都係咁樣鍛鍊出嚟。

回應 (3)

我要發表

2014/06/12 17:48:36 回覆

電話響起，有冇嚇親隔離左右？

2014/06/12 16:39:10 回覆

五六十年代啲金曲識聽，今時今日啲金曲唔識聽，脫節。 ${#iconb_395}$

2014/06/12 10:27:41 回覆

我的鈴聲全部是自己錄既，獨一無二而且分晒類，你既鈴聲是你唱既十二欄杆。