刮龍世界

你刮我又刮

強者當自發

大話掛嘴唇

能使黑變白

今年黃金周假期顯示、祖家遊客數字比往年同期下降一成二、而且旅客消費方亦見下調、有人將責任推到趕客幫身上去、不過在下對此等說法不敢茍同、唔知你又點睇？並不是在下存心靠嚇、其實這不過是剛剛開始、明年黃金周將會見真章。以目前形勢看來、祖家整體經濟放緩、人們消費意欲下降、加上寶島、高麗、以及東南亞等地的接待訪客能力優於紫荊城、景點、購物等方面亦具相當吸引力、更多人願意選擇那些地方作為渡假好去處是不難想像的。因此紫荊城是否削滅自由行旅客數字已經無關宏旨矣！

其實紫荊城基層大眾面對的困難並不在於遊客多寡、而係水貨客為患。騎呢騷廳長早前表示、他統計過一日多次進出紫荊城的祖家遊客只佔總遊客數量五個巴仙、因此而否定一簽一行嘅建議。不過他並冇提及這五個巴仙重複進出本城嘅水貨客就是損害基層利益嘅罪魁禍首。騎呢騷之所以不提、大概是水貨客對於生意人來說簡直是個大財神。因為除咗生意做多咗之外、最過癮嘅就係坐地起價賺上加賺吖嘛！換言之紫府一日不肯正視這個問題嘅話、生意人就可以繼績刮粗龍、但代價就是民怨加深、社會矛盾加劇。唔信？今年七一就會有答案。不過對於某些全家早已不是紫荊人的大老爺來說、一切都無所謂。

祖家政府意識到樓市泡沫對整體經濟已構成威脅、早就以行政手段壓抑炒賣過於蓬勃的地產市場、加上祖家嚴厲打貪和加緊監管及追踪非法熱錢去向、再加上外圍地產泡沫面臨爆破邊緣、城中可能出現兌現潮、炒賣集團會把握時機及早把存貨削價傾銷、然後擔定張凳仔邊洗白白邊等睇好戲。據國際銀兩基會透露、紫荊城是當今世界樓市泡沫最高風險之地。依在下睇、若然人家跌三成、恐怕咱家跌夠五成、到時難免一街都是大閘蟹矣！所以在下早就講過別只見樓市忽然蓬勃起來就以為撈到粗嘢、其實只是回光反照而矣！執筍盤？再過兩年都未遲。若有懷疑、不妨認真觀察一下某些消息靈通嘅行企和爛法代表、看看是否有人已經靜悄悄地將貨尾割價脫手便知到應該點做架喇！