合一咖啡屋餐廳

佐敦吳淞街近柯士甸道這間咖啡屋，行過會以為係Starbucks，望真一點才發覺唔係！

年多前，有朋友請飲，我與幾位朋友諗住早點約埋一齊，先飲杯嘢才去飲宴場地。當時，我建議去呢間(當時我都未光顧過)，諗住容易搵位咋----因為我每次經過，都祇見小貓三四隻！

但果次最終去左第二間。

我美國位大佬每次來港，都係住響柯士甸道間龍堡酒店---貪佢便宜囉！有咩問題啫？人但求三餐一宿啫，祇要係乾淨企理就得啦！對我來說亦方便---小巴去到酒店門口。

星期六約左親友相聚，見距離食飯時間還有個多小時，又唔想響酒店發吽豆，諗住響附近飲杯嘢。大家樂、Starbucks、茶餐廳....果個鐘數，要有位又要坐得耐都唔容易！我又建議去呢間咖啡屋。哈哈！咪又係貪佢容易搵位囉。

第一次光顧，我地五個人叫左三個下午茶餐加兩杯拉花咖啡。價錢不便宜，有個二人teaset一百五十幾蚊----酒店價錢！下午茶餐五十幾至七十幾，不過質素唔差：

鴨胸沙律---鴨胸唔太咸、沙律菜好食！

呢個辣意粉，我唔食！我大佬同姪女鍾意食辣，佢地話「正」！

小食拼盤，有巴馬火腿，好食！

單叫嘅咖啡麻麻---Starbucks 或Coffee Bean好些，拉花亦拉得唔靚！

最失敗係個咖啡杯，手指穿唔入個杯耳，個杯又重！

大佬：「食物唔錯，何解生意咁淡薄？」

姪女同我(我地真係一齊咁講架)：「梗係啦！響呢條街、咁嘅價錢你會覺得貴！但係如果你覺得價錢唔貴、你又會嫌呢個地點差！」

不過，我姪女補充：「第二時如果返香港約人短聚，我都會嚟呢度，幾方便，食物又唔差！」

睇埋宣傳單張，佢有包場服務。如果攪小型宴會，都係不錯選擇---上層有三間獨立房間，可分別容納30-40，20及10人。全店可容納130人。