寫在七一之後

香港五十萬人上街，社會正面臨嚴重的分化和對立，而那沒有上街的七百萬沉默大多數，究竟是如何想的？

以下摘錄自李純恩寫的一篇刺骨入肉的文章，是一個典型香港仔的心聲，看完之後有人彈，亦有人讚，你又認為如何：

「香港人，你們其實太過份了：                 

1．回歸15年，誰在香港最冇言論自由？係中央，佢打個乞嚏，都比港人鬧爆叫佢收皮，連中聯辦的人行出街，就快都比人告遊蕩罪。

2．雙非嬰，呢個漏洞係香港人自己一手造成的。中央本來就話過，父母無居港權，係香港生既BB都一樣無，係香港法院自己死執住莊豐源案話有，先搞到今日的田地。衰D講，蝗蟲災難，唔係中央指使入侵，係港人自己傻仔打開後門，叫人入黎。

3．中央當年應承左2012年有普選，係何俊仁帶頭做枱底交易話要2017。點解？特首選舉已比晒答案你。

4．邊個逞英雄幫賓賓搞居港權？係公民黨。但在雙非嬰問題上，呢班政棍有好似幫賓賓咁落力，實質做D野幫港人同政府爭取過咩？而阻撓實行最低工資最賣力係邊個？就係地產黨既立會代言人。

5．點解咁抗拒梁振英做特首呢？唔係口口聲聲成日話政府弱勢，對住班有錢佬冇符咩？依家終於有個唔賣有錢佬賬既強人出現，你地又唔要，你地究竟想點？

6．幾年前東江乾涸，廣東省人勒緊褲頭捱制水，中央都唔肯減少一滴供水比香港；你地諗住抗議班人，當年有幾多個自動節約用水，同國家共渡時艱？

7．香港有冇犧牲小我，完成大我既精神，去配合國家既鐵路發展？當全國省市已積極配合動工，甚至高鐵在多個地方已通車時，菜園村仲係度為雞蒜咁大塊地來拗餐懵。中央有哼過你地一句嗎？

8．自由行係邊個要求的？係港人，因為沙士後，百業蕭條，要靠大陸泵水。亦係港人要求CEPA攞著數的。

9．港府自己犯賤，死撐要自駕遊，港人大力反對下，中央即刻妥協，話大陸D車唔落黎，但香港D車可以上去。你估大陸城市塞車唔嚴重咩？

10．今次選舉爛攤子，邊個出黎執手尾？仲要執完，仲要比你地鬧干預。我想問下希望流選既人，有冇仔細諗過流選後，邊個先最適合做特首？ 香港已經咁分化，你有信心七一交接前，大家可以有共識嗎？

呢15年來，中央對港人做過咩衰野，要如此不共戴天地同他處處撐到行？佢有冇無殺左你全家？佢盡力比最大利益錫住你，你又為佢做過D乜？中央好委屈，

佢做野又俾人鬧干預，唔做又俾人鬧唔撐，香港小市民，共產黨從無係你手上榨取過一分一毫，搾乾你地既係班地產黨賣港賊，同埋貪曾政權。

中央俾既所有利益，俾佢地蠶食晒，但就要中下階層付出代價。民怨沸騰時，就擺中央上枱，話佢會出坦克鎮壓市民；你地係咪仲做無恥之徒既棋子，行出去反梁振英？點解班鄉紳土豪惡覇咁怕佢？因為梁生要佢地嘔番D既得利益俾我地！

土豪最叻用普遍人怕中共心理，想將佢拉落馬，你仲要中佢地計？香港而家面臨極度分化，請用良知去做正確選擇。

港英時代有過民主嗎？港督由英國直接委任，事事要向英國交代，這叫做民主嗎？這叫不干涉香港事務嗎？97以前有平機會嗎？有伸訴公署嗎？有監警會嗎？97以前民選議員的議席，比率仲少過現在，你們知道嗎？」