萍果蔬菜湯
2014/07/07 14:11:04 網誌分類: 食譜
呢個湯係尋晚果集「吾淑吾食」黃淑儀教嘅。講真吖,我冇咩興趣學佢教煮嘅餸---可能佢鍾意食辣掛(但我唔鍾意),佢煮嘢係唔係都落隻辣椒呢樣嘢令我冇興趣學!不過,呢排鍾意煲齋湯,尋晚咁啱教煲呢個湯,今日咪煲嚟飲囉!
材料:
甘筍兩條
番茄兩個(原食譜係四個)
萍果4個(我加多左個青萍果---早兩日整醉雞用剩嘅,用得唔好嘥啦)
糖冬瓜十條
粟米兩條
陳皮一角
淨係睇材料都知一定好飲兼受小朋友歡迎啦!,一字記之日「甜」!
我好慳架!一早煲好,攤凍室溫夜晚飲(冇油嘅,凍左仲好飲;不過,我唔鍾意放入雪柜),最主要係中午可以拎兩枝栗米當飯食,咁又一餐啦!
揀萍果呢樣嘢,唔駛我講,大家都知要揀啲皮光肉滑、外面唔好似隻斑點狗果啲啦!不過,大家有冇試過,萍果表面皮光肉滑、但係係黑心嘅呢?聽日我就要講吓「萍果」呢個話題。
雪凍好飲啲!
明日煲這湯。
我都係斷估嘅啫---斷估、冇辛苦!口味嘅嘢,最緊要啱自己啫!
係喎!加幾粒蜜棗好喎,唔該晒!
煲湯材料組合好自由嘅,不過因為落左番茄,所以帶酸,糖冬瓜甜有中和作用,雪梨未必夠甜,我諗加幾粒蜜棗好啲。
我都有睇呢集,想煲呢個湯,但冇糖冬瓜買,換雪梨都得啩,係咪?