姐妹們的終身事業---減肥！(上)

這樣說，並不為過！以我來說：年輕時為了穿衣好看、年紀大了為左健康！

肥伴呢樣嘢，上天最公平：有錢人食得鮑參刺肚多，肚滿腸肥；我呢啲窮人，自小豉油豬油撈飯、雞皮炒菜，唔肥幾稀唉！

不過，有錢人一邊食，可以一邊瞓響度請專人幫佢減肥；我地呢啲窮人要減肥、又俾唔起錢嘅，如何減？

說是年輕時為左穿衣，此乃真事。唔知有幾多位網友記得起約三十年前有間專營日本時裝嘅店鋪叫「Juliana」同「Mariana」(兩個名其實係同一店，當年第一間鋪開響佐敦)？想當年，日本時裝賣得好貴---入口貨喎！不過，呢間日本時裝店賣的是日本過期時裝，每星期五便有新貨，但衣服尺碼多是7號或9號的中小碼衣服，雖然間中都會有特大碼如11至15號，但正因為少，即駛有、轉眼間便賣了出去，所以要入貨便要星期五下班後去。

雖然不是日本最新款時裝，但因為款式比較實際，適合上班穿著；亦因為如此，價格便宜。當年來路貨買唔起、本地貨款式及質料均差，所以此店是一個OL超級之選。它在香港經營了一段頗長的時間，後來因出口時裝及韓風吹起，已結業多時。

當時為左可以穿9號或11號衫(有錢就唔駛咁啦)，唔努力保持體重都唔得啦！可惜體重一樣按年遞增，好彩那時多了很多出口時裝店----當時的出口店賣的真的是出口貨品，賣給外國人穿，所以尺碼大，啱我！香港製衣業式微後，出口成衣店經已絕跡；衣家叫做出口店果啲祇係個名叫「出口」。

喂！仲未入正題呀。腦退化....唉

唔好以為我未試過俾錢減肥---雖然窮，儲埋錢隔一段時間，都會忍痛(真係好痛：無論係荷包定係身體)俾錢人幫我減肥！無法子，我一日識呼吸都會肥，食少啲都唔係辦法。

由最初嘅「瑪花」(凍到你想死)、飲減肥茶(痾到你死)、搣脂(痛到你死)、搽辣椒膏(熱到你死)、搵西醫(食藥食到個心識跳舞)、俾錢請人教做減肥運動(辛苦到死！仲越減越肥)、搵營養師(冇啖好食！鬼唔知該食咩嘢、唔該食咩嘢咩？做得倒嘅、唔駛搵你啦)...總之你嗡得出嘅、唔嗡得出嘅減肥方法我都試過。

最終....響退休後半年便瘦了十磅！理由：

一. 冇糧出，想唔瘦都幾難；

二. 少左食飯盒(依家一日食兩餐咋)，食住家飯；

三. 少左出街食(都係因為冇錢)，食量和食物可以自己控制。

唉！仲未入正題呀...