趙五娘千里尋夫(酒樓騷版)

一向唔鍾意出酒樓「騷」---嘈吵、冇咩人真係聽你唱！不過，老友邀請、又做個順水人情啦！呢首歌拍檔早兩年出過「騷」，唔駛點操；咁啱呢兩三個月我又與「哎呀大仔」操過兩次，所以揀呢首歌，唔駛點花時間操。

主辦人前日才通知，因為佢地師父冇教過呢首歌，所以佢地冇曲紙，叫我記得帶十份曲詞去；仲一路講錯個曲名，以為我地唱「孟姜女尋夫」！

抽簽決定唱第一，傍晚六點開始。果陣有人搏緊命竹戰，真係無所事事坐響度聽嘅人得果卅人左右。不過，都無所謂啦，咪當操曲囉---操曲冇人聽都係咁啦！

雖然人少，但係睇得出坐響度嘅人真係用心聽我地唱；反而後期果啲----人一多便更嘈，連唱咩嘢都聽唔倒、人雖然多，但係個個顧住食嘢傾計，更加冇人理會唱者！朋友感概說：你地唱第一好得多！響康文署嘅場？個個抽倒第一同第七都扁咀架。

所以我成日講：企響廟街唱都唔緊要，最緊要係有真正嘅聽眾。

不過，始終酒樓嘈，啲杯碟聲同人聲此起彼落，錄音效果都唔係咁好！

日期：2014年8月2日

地點：香港某酒樓

演唱者：BB/VAN

https://app.box.com/s/vppnurrpjics5j3ft5sw