涼拌雞絲粉皮

夏日炎炎，最好莫如食涼拌菜。江浙人最喜歡涼拌---西芹五香豆腐、醉雞、油爆蝦、薰魚、雞絲粉皮.....去到上海菜館可洒上唔多唔少都會叫啲嚟食！

涼拌菜好處係可以預先做，食時響雪柜拎出嚟便可。不過，整涼拌菜最緊要係清潔，否則好容易病從口入。

呢個涼拌用左麻醬汁(鍾意食辣嘅咪食果陣自己加辣油囉)。

材料： 

雞脾兩隻  (我買左冰鮮美國雞脾，用酒醃一會，蒸熟去皮撕細；懶得撕嘅咪切囉！我唔鍾意切，拌嘅時候好容易碎晒)

粉皮   (多少隨意。人多嘅最好買新鮮粉皮(要買十塊)，我食唔倒咁多，新鮮嘅又唔耐放，所以我買左包裝粉皮；這些粉皮我用了五塊切粗絲，包裝度寫住要用滾水煮2-3分鐘，實際上稍為滾一陣，見佢軟身、透明便可取出隔清水放碟底。

青瓜一小條   (開邊再切薄片或切絲，用少許鹽醃十分鐘，揸乾水入放碟上。)

將主角雞絲放碟中央。

用保鮮紙蓋上放雪柜待食時取出，淋上麻醬汁。

麻醬汁：

麻油2湯匙、芝麻醬1湯匙、花生醬2湯匙、熱水3-4湯匙、糖1茶匙拌勻

食時才撈勻。

註：

一. 雞不用調味。青瓜祇用少許鹽略醃，如擔心過咸可於醃後用開水再洗過揸乾。

二. 花生醬用粗粒或幼粒都冇問題。但每種牌子咸味略有不同，拌勻汁時可以趁熱時試味，看看是否需要加糖。

三. 新鮮粉皮比較稔滑，食得晒嘅最好買新鮮貨啦！不過，如果用到十塊粉皮，汁的份量要跟比例加多啲。

四，鍾意嘅，食時可洒上炒香白芝麻。