沉默的大多數

早兩日舊老板約左我同另一位朋友食晏，原訂去珍寶海鮮舫；響我屋企去都幾隔涉，乘隧巴去到香港仔仲要再轉專船。原本問題都唔大嘅，我呢啲無業游民、時間都係要嚟嘥嘅啫！

早一晚朋友叫我先去佢黃竹坑屋企，佢叫伙記送我地去碼頭搭船。我呢份人逢到必早，一早去到黃竹坑，豈料落車果陣便是全日最大雨嘅時候，攪到成隻「落湯鴨」咁(我梗係做鴨都唔做雞啦！一來我唔係姓馬，二來我又唔止廿六對)；還好我早到，可以響朋友度吹乾個人同啲衫先！

坐不了多久，老板位司機哥哥打電話俾我：「阿Van，好大雨喎！駛唔駛響邊度接埋你？(又唔早講)」

我：「唔駛！我入左阿？度啦。不過，今日揀去「珍寶」真係唔係咁好囉！」

話口未完，老板位助理又來電：「阿Van，好大雨呀！不如改去鄉村俱樂部。」

我梗係答好啦，就響附近咋。

午飯時講起今個星期日嘅「反佔中大遊行」。

我：「我相信反佔中嘅人(包括我地幾個)都係鍾意和平、著重經濟繁榮人士，「反佔中簽名運動」我絕對支持。但係，我地呢班沉默的大多數，基本上都係四十歲以上，經歷過幾許風雨嘅人，我地唔會鍾意去遊行----天氣、體力...最主要係考慮到遊行影響交通、影響左原本住響果附近嘅居民和店鋪！我亦慶幸十幾年前由香港搬左過九龍住---依家銅鑼灣至中環一帶，冇咩嘢必要都唔想去！

報載(唔知真實性！不過，據我所知，無論係左定右，為左吸引多啲人參與，都會有不同程度嘅回報給予遊行人士。當然，任何遊行都有一些係自動自覺，不問報酬人士)：有團體派錢搵人參與遊行，此種行為絕不可取！

個人認為參與遊行人少，不代表大部份市民唔支持「反佔中」！正如我所講：我都支持，但係我唔會做埋啲損人又不利己嘅嘢！參與人數無論有幾多，相對全港市民人數一樣係大巫與小巫---冇得比！

支持「佔中」人士認為高官不應簽名支持「反佔中運動」，咁樣又係雙重標準啦---佢地早前攪果個「政改公投」有冇唔俾公務員、高官投票吖？公務員、高官都係人啫！據我所知，有不少高級公務員都係泛民支持者。如果雙方都嚴禁公務員/高官參與，咁樣就公道啲！