蒜拍青瓜

早兩日整「涼拌雞絲粉皮」，用剩兩條青瓜仔，用嚟做咩好？當然可以當生果食，不過，反正天時暑熱，一於用佢嚟整「拍青瓜」啦！

有名你叫咯，「拍青瓜」梗係拍出嚟架啦！所以，如果出去食肆叫呢味涼拌，拎到嚟見倒係切細嘅，即係做得唔正宗囉！

至於涼拌料，我呢個算係最簡單架啦！可以加入醋同糖、甚至辣椒；不過，我個人唔鍾意食酸，而且落左醋又一定要落番糖嚟中和佢(攞嚟攪)，所以我祇用蒜茸、鹽同麻油。

材料：

小青瓜兩條

蒜茸兩湯匙

鹽1/2茶匙

麻油較多

一. 青瓜切底洗淨抹乾，放保鮮袋內。

二. 用菜刀平拍至散開，再用手或刀撕/切件。

三. 蒜茸加鹽放小碗內。爆滾麻油，倒入蒜茸內拌勻，待冷。拌入青瓜內，包上保鮮紙放雪柜。

早兩日先整左「話梅涼瓜」食，不過唔記得影相！真係好熱呀。