人誰無錯？

影壇大哥大嘅兒子，疑因涉毒當場被捕，牽起娛樂界隔空罵戰。有人認為此子年紀尚幼，人誰無錯，唔應該落井下石。

呢種罪行發生響外國可算是碎料一單，但係我地祖國一向對吸毒/販毒者均嚴懲----住響人地果度、連呢啲嘢都唔知(就當佢年幼無知啦！不過，佢卅幾歲人喎)，都應該食得咸魚抵得渴啦！

另一位一同被捕果個年輕人咪重慘(得廿幾歲，重可算是年幼無知)，日後可能「前途似咁」---無法啦！鬼叫佢無個重量級老豆照住咩！

今早買完餸回家，在電梯大堂聽見樓下一位阿叔拎住張剪報問看更：「照片果個係咪做大廈清潔果位阿姊呀？報載佢個仔考試科科攞A喎！」

看更證實係。

呢位阿叔與我一同乘電梯，打過招呼後，我說：「阿？姊以後唔駛愁啦！」

阿叔：「報導話佢個仔以前犯過事，入過懲教署。」

我：「哦！依家發奮做人，咁都係好事吖。最緊要知過能改啫！」

冇錯，人誰無過？問題係：唔係做錯任何事都有機會可以改過---如果卅幾人歲去殺人放火，咁就救都救唔番啦；所以，最好梗係唔好犯錯啦！否則中國人都唔會有「一失足成千古恨，回頭已是百年身」呢句話啦！

果位大哥之子，雖然日後即使無工作做都唔需要擔心生活----咁樣諗嘢最弊！正因為咁才有「富不過三代」呢句說話----因為跟住果兩代持住老豆大把，hea住做人！但係，穀種總有一日食完嘅。

亦正因為係咁，所以好多窮人嘅下一代都好發奮，希望有一日可以脫貧！