木耳杜仲豬尾湯

上星期響肉檔買豬骨煲湯，秤好後肉檔位哥哥講：「三十七蚊。」

當時我俾左四十蚊佢，臨走時發覺佢找左四蚊俾我。

我：「哥哥！你找多左一蚊俾我。」

哥哥：「係呀！我唔鍾意個七字，所以收你三十六蚊。」

尋日朝再同佢買豬尾(一條豬尾好大條架，不過今次要醫病就大手筆啲啦)

我：「可唔可以切左上面果截，太多啦！」

哥哥：「不如我切左其中一面啲肉，重量差唔多架咋！」

我：「好啦！」哥哥切完放上磅度，價錢顯示係七十七蚊。

我：「咩嘢解救你次次都係「七」架，你唔鍾意「七」、我都唔鍾意「找四」(找死)喎！」

哥哥：「咁收你七十五蚊好唔好？」

我：「好！」Bingo!

材料：

豬尾一條切件飛水洗淨

白背木耳20克浸一晚去蒂切粗條

杜仲五錢略浸洗

黑豆半碗(先用白鑊烘至皮裂開)洗淨

去核紅棗廿粒

果皮一角浸軟

將全部材料放滾水內煲滾，收細火煲三小時。

此湯因為落左成條豬尾，加上廿粒紅棗，煲好我連鹽都冇落。

註：

一. 杜仲可降血壓、利尿和對腰骨痛有幫助，孕婦忌食。

二. 白背木耳有助降膽固醇，活血去瘀、通血管，但孕婦忌食，而且每次進食不宜過多。

三. 紅棗同烏豆補血。

四. 豬尾據講可以以形補形喎！