長征

尋日出「騷」，雖然係做日場，由於我中午慣常唔食嘢，一定要食個豐富嘅早餐才起行。因為約左化妝小姐十點，所以朝早七點幾便落街食早餐，加上果個社區會堂好隔涉---我由紅磡要搭小巴上火車站，去到粉嶺又要再轉的士；我份人約人有早冇遲，而且十點開始化妝都有點趕(我唱第一同第三)，所以我預左八點半起行。

食早餐果陣諗：八點幾搭小巴人最多，我又拖住個喼，阻住小巴上嘅通道都幾乞人憎，所以諗住拖個喼行上火車站(十五分鐘行程)。

食完早餐返屋企攞嘢出門，行過小巴總站；咦！冇人等車嘅？才醒起尋日係星期六，大多數人唔駛返工；於是「拿拿林」返閨拎個喼出門，免得遲些人多！

2007年後都冇響社區會堂出過「騷」----我唔係好似某些人咁，要揀大場先肯出「騷」，佢地認為出大場顯示自己聲價與別不同！我認為，企街唱都冇問題，最緊要係真係有人欣賞啫！即使係佢地認為嘅大場：如沙田大會堂、荃湾大會堂....千幾個座位，如果入場果啲都係自己親友、曲友，塘水滾塘魚，有咩嘢意思呢？

當然，即使係響社區會堂唱，我嘅要求係音樂要好，否則唱得唔順心，寧願唔唱！但係通常響社區會堂攪「騷」都會將貨就價，一般嚟講，音樂差、音響差，跟住梗係整體都差啦！所以曲友知我咁衰，都唔會叫我出會堂「騷」。

尋日個「騷」係我個「哎呀細仔」攪嘅，佢打電話問我玩唔玩嘅時候，一開始便講明音樂係靚音樂：主要果幾個一聽大名就知咩嘢料，所以應承左。

 (帝女花之庵遇)捧場曲友手機攝下照片：

因為佢地坐響舞台左手面，所以全部祇影倒我右邊面---佢地知道我左邊面唔見得人呀！

尋日嘅音樂確實係靚音樂。可惜吖，音響唔得！唱第一首「胡地蠻歌」經已聽唔倒自己把聲，入後台第一時間講俾阿仔聽子喉個咪有問題，其後果啲先好啲。

當然，一般人出「騷」最怕唱一頭一尾----唱第一人未到齊、唱第尾好多人又走左，小貓三四隻，梗係唔好啦！不過如果頭同尾揀，個個都寧願唱第一都唔想唱第尾---響康文署場地唱第尾仲有樣嘢麻煩！夜埸十一點便落閘放狗，男人著件西裝就話可以即走啫，做旦嘅即使唔落妝都要換番便裝先走得架，真係趕喉趕命架！我如果唱尾曲一定響晚裝裡面著埋條三個骨窄腳褲，咁走果陣著件T恤便可以走人！

但係唱第一一樣唔好---唔係因為人多人少問題！我都話我緊張唱歌效果多啲：唱第一通常做天竺鼠(guinea pig). 尋日場騷冇機會試咪，我唱第一，問左口唱，即使知道個咪有問題、焗住都要唱啦！難道叫人停左、攪掂個咪至唱咩？如果音響果位大佬醒目嘅，佢都應該自己調較吓，呢啲嘢仲駛人叫嘅咩？

呢啲情況，響康文署場一樣有問題！前年油麻場轉為康文署場地後，我第一次做「騷」唱第一，音響一樣唔得(雖然之前有試過咪，但係可能冇觀眾試咪、同有觀眾會唔同)，祇不過，康文署場地負責音響嘅職員聽倒有問題，唔駛人叫都會幫你調較，所以第一首歌聽落頭同尾啲聲都會唔同。

所以，唱第一係俾人做試驗品、唱第尾係考你換衫效率！

尋日場「騷」雖然係日場，散左場去食埋飯(算係慶功宴)，傾吓傾吓都傾到九點幾，番到屋企差唔多十一點，仲要由頭洗到落腳，跟住仲要吹乾個頭先可上床瞓，睡前梗係要即時聽番唱尋日唱果兩首歌，做埋死因研究先至瞓啦；再一次證明啲音響真係唔得，音樂太大聲，唔「和」！

有陣時心諗：咁辛苦為咩？