雞蛋仔

早兩日睇電視，有個節目叫做「香港美食100強」，果日係最後一集，原來雞蛋仔獲選為冠軍。

我相信香港人冇人未食過雞蛋仔，祇差在喜歡食嘅程度。

當日節目除左宣佈雞蛋仔獲獎之外，亦播了一段在某雞蛋仔鋪頭，由店主示範整個原味雞蛋仔出嚟。當時鏡頭所見---是紅磡！我並不覺得出奇，因為我樓下果間雞蛋仔好出名，經常排大隊，不過，佢祇賣原味雞蛋仔。但係，原來唔係影呢一間，而係一街之隔果一間；至於何解？不得而知！但係介紹果一間雖然係一街之隔，唔好意思，我未幫趁過！如果你有睇呢個介紹，你睇吓影出嚟果底雞蛋仔，你都唔會有興趣食---外面焗到一撻黃、一撻啡，加上連內在美都冇(入面有大房出租)！追女仔一樣啫，外表唔吸引，你又點會有興趣同佢再進一步吖？

傳統嘅雞蛋仔，獨孤一味---原味、蛋味囉！雞蛋仔，難度會有朱古力味？

冇錯，祇要響傳統食物度加啲諗頭，冇咩嘢係唔可以發生嘅！雞蛋仔真係有朱古力咪架！

以上呢個就係「朱古力味雞蛋仔」，除此之外，仲有白芝麻味。個人唔太喜歡朱古力味，嫌佢甜，除左原味，我較喜歡芝麻味！呢間係新潮雞蛋仔鋪，所以有三種味道嘅雞蛋仔賣。價錢較隔離間傳統雞蛋仔貴幾蚊一底--不過，如果食原味，我還是較喜歡傳統那一間。

雖然較貴，新潮這一間亦有其可取之處---門口放左樽消毒藥水鼓勵大家先抹手、再食雞蛋仔(好多人係企響街度食嘅)；此外，每整完一底雞蛋仔入袋後，都會用風扇稍吹，相信係令雞蛋仔較脆口。此店最失敗咪係搵左盧？？拍段宣傳片響度播囉！見倒佢肥屍大隻果個款，原本想買雞蛋仔食都可能因係見倒佢要放棄！