蓮子百合紅棗雪耳糖水

尋日竹戰，前晚買定一包鮮百合(處理左放雪柜)、浸左個雪耳(切碎)、尋日朝早買左一磅鮮蓮子(買唔倒冇衣果種)，諗住煲「蓮子百合紅棗雪耳糖水」。

另外買左罐椰汁，因為我鍾意落椰汁。豬朋未到前經已煲好，我諗住攤到室溫食。後來才知原來佢地個個都鍾意熱食，咁咪再煲滾佢囉。

材料：

鮮蓮子約十二兩去心(可以嘅，買去左衣果種)

雪耳一朵浸軟去蒂切碎

紅棗廿粒去核

鮮百合一大包(依家有大細包賣)撕去枯黃部份

椰汁一大罐(隨個人喜好，可以唔用)

冰糖

一. 煲滾適量水(煲好後有十碗糖水)，下紅棗、鮮蓮子、雪耳煲滾，收細火煮一小時下冰糖試味。

二. 試好味才下鮮百合，待一滾便熄火。

三. 如不喜用椰汁，可即刻食。如全世界都喜歡椰汁，煮好便可以落大半罐椰汁。如果各人有各人喜歡，便食時各自落。

原來我班豬朋都喜歡落椰汁，於是將大半罐椰汁落落糖水度---個個食過都話「正」，一個二個食左兩碗，仲意猶未盡。

註：

一. 因為大部份人都唔會食埋啲紅棗，所以我煮好後拎走左啲紅棗。

二. 鮮百合不耐煮，所以煮好後一滾便可；當然，懶的話，與其他材料同落也可，不過食果陣啲百合爛溶溶---不過，自己鍾意咪得囉：祇要唔犯法！千其唔好又要犯法、又要怪人地用胡椒噴霧對付你！

三. 如果冇人鍾意落椰汁咪唔要囉！又或者得兩三個人鍾意嘅，咪買罐細嘅用囉！