撕裂友情
「佔港」對香港經濟上嘅損害,顯而易見,但係對全港市民最大嘅傷害係父母子女反目、朋友反目、同事反目、甚至係男女朋友反目!
朋友、同事、同學反目問題都不太大---我成日都講:朋友有得揀、貴精不貴多!啱傾咪傾多兩句、唔啱傾嘅睬佢都嘥氣!
但係屋企人如果意見相左,特別係政見不同,都幾麻煩!
雖然我響政治舞台打滾幾十年,但係講真,我討厭政治!英文有講:dirty politics(政治係卑劣下流嘅),冇番咁上下奸,都好難響政治舞台立足。
即使認識左幾十年嘅朋友,平時都甚少會接觸政治議題!我退休後亦甚少講,但係呢排俾果班人攪到佛都有火!
尋日上「伴奏班」,下課後七位同學一齊食茶。我地飲過幾次茶,都算談笑甚歡。
尋日係「佔港」後第一次上課,我地上課地點又響附近。其中一位同學發表對「佔港」者不滿,另一位同學X即時反駁:「我又唔認為啲學生唔啱喎!」
又另一位同學:「攪到人搵唔倒食都啱?」
X:「一人一票,有得揀總好過冇得揀吖!」
另一位同學:「咁到時選左「短毛」做特首點算?」
X:「點會吖!我一定唔會選佢囉。」
同一位同學:「但係佢響果個選區係票王嚟喎!」
我原本睇緊電郵,聽見開始有啲火花,問X:「咁你認為,如果一人一票會選倒邊個做特首?」
X:「我唔知!」
我:「我嘅意思係:如果今日選,你估會選倒邊個?」
X:「我唔知!」
我:「通常咪最多人認識果個囉!候選人你識得邊個?知道呢個人都唔代表你清楚佢嘅人品、能力!呢個世界好多雙面人---政壇更多!所以一人一票冇人可以預計結果;咁係咪選倒一個唔啱嘅又叫佢下台,選過一個?算啦!今日祇談音樂,不談政治。正話老師講緊玩「阮」唔可以.....嘩!我幾驚佢話緊我呀,後來見佢行左去另一邊,方知佢講緊另外一位同學!」
同學:「係呀!後面有位同學個「阮」都裝左擴音器,所以老師聽倒佢撥錯。」
另一位玩「阮」嘅同學一向坐響我身旁,尋日因為遲到,結果被安排坐左響另一邊(我地剛剛搬左地點上課)。佢:「我下一堂要早啲返,坐番響你旁邊!我要你傍住先得。」
另一位學洋琴嘅同學:「係呀!之前我坐響你前面,聽住你個「阮」嚟打琴好好多架!後來老師叫我過左另一邊坐。」今日,老師安排佢坐番響我隔離。
一位玩洋琴、一位玩阮嘅同學都爭住要坐響我隔離。
我:「好!下次我同老師講:我隔離果兩個位,價高者得架!」
一場激辯,和平收場。好明顯,七個人中祇得一位係「佔港」支持者。既然如此,第日咪避談呢個話題囉!同學關係最簡單---啱傾傾多兩句,唔啱傾下課後雞飛狗走!
朋友可以洗牌再嚟過,屋企人又如何?
因為屋企人多,各有不同,一早講咗,在家不準講,免傷和氣。
藍鼠:阮同琵琶都係絃樂。識玩琵琶、玩阮會好容易;但係識玩阮,未必玩倒琵琶。響中樂伴奏,阮係好重要嘅樂器!
原來「阮」係咁嘅,未見過成日幻想佢似琵琶添!
靚豬:談何容易吖!食緊飯電視新聞播出畫面,會唔會有人不經意聽左句其他人唔啱聽嘅說話。
意見各有不同,我屋企食飯時不談政治。
係呀!不過我果個细D。
網上搵到你講既呢種樂器,佢個好似笑緊喎。