民主是啥？

民主未益你

已先傷和氣

眾生標松柴

無非皆為利

日前白鴨黨坐館婆瞓街姐被書生追問何謂國際標準嘅時候、她回應謂「能夠讓不同政見者參選舉」就係喇喎！睇嚟、瞓街姐可能係瞓唔醒都未定喇！難道她認為花旗人會容許共產黨人參與該國各級選舉嘅咩？答案當然係唔可以吖嘛！道理正如阿爺是絕對不會容許外國勢力干預縣首選舉一樣咁簡單。若問那一家民主模式才算係真正嘅民主、那實在不好說。之不過、山姆大叔那套金權政治式民主在世界流行榜上高據首位、而目前阿爺那套一家專政式民主仍未上榜而矣！

講開又講、民主呢家嘢聽起來簡直像魔咒一樣使人着迷、但當人們把其面紗拿走之後、就會發現原來是當權者以此來催眠大眾的把戲。現在就拿自稱是世上民主最大國嘅花旗來作個比喻吧！在總統大選之前、民主、共和兩黨內有意思參選嘅政客、首先會走訪各州各郡硬銷自己嘅一套管治理念以爭取民望、人氣最高的人就會成為該黨唯一提名人、最後就是擺上台讓全國民眾以一人一票方式揀一個人出來當總統。一般而言、人們眼見以上一切便認定這種就是民主選舉。但殊不知原來兩黨嘅提名人在未公開自己參加競逐之前、必須先獲得大財團答應在背後大力支持才行。講得白一些、就是大財閥透過政黨、擺兩個心儀嘅人物出來讓民眾隨意揀選一個而矣！

咱家龍的傳人作事向來不屑偷雞摸狗、故此在選舉之前、擺明車馬由全國唯一大黨透過內部協商議定一份候選名單、然後再呈交國會以一人一票（可選擇投贊成票、反對票、甚至投棄權票都得）方式通過。如果名單獲得超過半數支持、名單上的候選人便可當選新一屆領導班子。由於咱家天朝奉行的是民主集中制、所以國會內嘅二千幾三千名人民代表、是由全國各省各市選出來嘅區域性代表所組成。從牌面看來、國會嘅選擇、就是代表着全國人民嘅選擇。由此可見、咱家龍的傳人確實是文明先進嘅民族、無論碰上甚麼選舉都好、總之不像西方那群紅鬚綠眼嘅死蠢咁、要自己落手落腳去投票咁辛苦、因為咱們有的是代表吖嘛！

呢嗱、呢個世界上嘅所謂民主選舉、大致上都只不過係咁上下、分別只在於究竟係由你親手將選票放入票箱、抑或是別人為你代勞而矣！